د کډوالو حضور د آلمان د بیکاري کچه ټیټولی شي | اروپا ته مهاجرت | DW | 24.10.2015
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

اروپا ته مهاجرت

د کډوالو حضور د آلمان د بیکاري کچه ټیټولی شي

یوې ورځپاڼې د شنبې په ورځ د آلمان د کار د وزیرې اندریا نیهلز، په حواله لیکلي دي چې دې هیواد ته سږ کال د سلونو زره پناه غوښتونکو د راتګ له کبله به د آلمان د بیکاري کچه ټیټه شي.

Deutschland Migranten Integration Deutsch-Kurse

انځور له آرشیف څخه

دغې آلمانۍ چارواکې د «پاسور نویه پریسه ورځپاڼې» ته چې د آلمان د بایرن ښار او اتریش تر منځ دفتر لري، ویلي دي: «موږ به [د کډوالو کړکیچ] تنظیم کړو، خو دا د یوي شپې کار نه دی.»

هغې په دې اړه چې آلمان ته نوي رسیدلي کډوال په څومره موده کې کار په بازار او ټولنه کې ادغام شي، وویل: «د با ظرفیته کډوالو له پاره دا د یوې متوسطي فاصلې منډه ده، خو د نورو کډوالو له پاره دا د ماراتون [اوږدې منډې] په څیر ده

نیهلز زیاته کړه: «موږ باید دا فکر و نه کړو چې ټول کډوال له سختیو پرته ادغامولی شو. د دې له پاره موږ له هغه څه چې تمه لرو، لا هم اوږدي مودي ته اړتیا لرو.»

همداراز هغې دا هم زیاته کړه چې د کار بازار ته د ننوتو له پاره د آلماني ژبې زده کړه اړینه ده او د دې له پاره چې ټول کډوال په آلماني ژبه حاکم شي یوي اوږدي مودې ته اړتیا شته.

خو هغه وایي چې د نویو کډوالو له راتګ سره به هغو آلمانیانو ته د کار زمینه برابره شي چې د کار په لټه کې دي. هغې وویل: «په حقیقت کې له کډوالو سره د مرستې په برخه کې به په زرهاوو نوې دندې رامنځ ته شي: د بیلګې په توګه په کور جوړونې، امنیتي، تدارکاتي او داسې نورو برخو کي. په دې ډول به د آلمانیانو د بیکاری کچه راټیټه شي.»

د آلمان د اقتصادي څیړونو د انیستیتوت مشر مارسل فیتزر، د کډوالو په اړه د صنعتي سکتور او سیاستمدارانو د یوي مشترکې غونډې د جوړولو وړاندیز کړی دی. د نویه اوسنابریکر سایتونګ ورځپاڼي د فیتزر په حواله ویلي دي چې د صنعتي سکتور د ملاتړ پرته به د کډوالو د ادغام پروسه ناکامه شي. هغه زیاته کړي ده: «حکومت کولی شي په مادیاتي ډول د کډوالو ملاتړ وکړي، هغوی ته د ژبې کورسونه برابر کړي او په ادغام کې ورسره مرسته وکړي، خو په اخر کې صنعتي سکتور مرکزي رول لوبوي.»

Ministerin Schwesig bei der Auftaktveranstaltung des Bundesprogramms Willkommen bei Freunden

انځور له آرشیف څخه

د آلمان د خوړو او تدارکاتي صنعتونو نماینده اتحاديي(NGG) د آلمان له خبري اژانس سره په خبرو کي ویلي دي چې د هغو ځوانو کډوالو له پاره چې په آلماني ژبه پوهیږي د کار فرصت شته. د آلمان په نارت راین ویستفیلیا ایالت کې دNGG ساحوي مسوول توماس ګاوګر، وایي: «د خوړو پخولو په برخه کې موږ نویو کارګرو ته اړتیا لرو.» همداراز هغه زیاتوي چې دا اداره د خوراکي توکو په پلورنځایونو کې، د خوږو په فابریکو کې او همدا راز په نانوایي ګانو کې کارګرو ته ضرورت لري.

د آلمان د روغتیا وزیر هیرمان ګروهي، له راینش پوست ورځپاڼې سره په خبرو کې ویلي دي چې هغه چمتو دی چې هغو کډوالو ته وظیفه ورکړي چې د روغتیا په برخه کې تجربه لري او دا کسان به بیا له نورو پناه غوښتونکو سره کار کوي.

ګروهي راینش پوست ته وویل: «د ژبنیز وړتیاوو له کبله هغه کډوال چې د روغتیا په برخه کې تجربه لري کولی شي چې د کډوالو په لومړنیو کوربه مرکزونو کې له موږ سره لویه مرسته وکړي.»

هغه دا هم وویل چې دا کسان به په دې مرکزونو کې له آلماني ډاکترانو سره همکاري کوي.

DW.COM