د نړۍ تر ټولو قیمتي ماسک د جوړیدو په حال کې دی | آلمان او نړۍ | DW | 11.08.2020
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
اعلان

آلمان او نړۍ

د نړۍ تر ټولو قیمتي ماسک د جوړیدو په حال کې دی

د یو نیم میلیونه ډالرو په ارزښت د سرو زرو یو ماسک چې د آلماسو ۳۶۰۰ غمي لري د جوړیدو په حال کې دی. دا ماسک د یوه اسرائیلي زرګر له خوا د یوه چینایي سوداګر په فرمایش جوړیږي.

د خولې او پزې ماسک چې په نړۍ کې د کرونا ویروس د خپریدو د مخنوي په خاطر ترې استفاده کیږي نور نو یوازې یوه روغتیایي وسیله نه، بلکې د مود په صنعت کې پر لوکسو توکو د بدلیدو په حال کې دی.

په فبرورۍ میاشت کې د لندن د مود اونۍ په نندارتون کې د ماسک د مود ماډلونه نندارې ته وړاندي شوې.

اوس د چین د شانګهای یو سوداګر اراده لري چې له دې روغتیایي وسیلې څخه د خپلې شتمنۍ نمایش ته د وړاندې کولو د یوې نخښې په توګه استفاده وکړي.

په اسرائیل کې یو زرګر د دغه چینایي سوداګر په فرمایش د داسې یو ماسک په جوړولو اخته دی چې یو نیم میلیونه ډالره ارزښت لري. د دغه زرګر په خبره دا تر ټولو هغو قیمتي ماسک دی چې تر اوسه پورې په نړۍ کې جوړ شوي دي.

د دې طلا فروشۍ یوه تن کارکونکي شارون کارو، د آلمان خبري آژانس ته ویلي دي چې ماسک له ۱۸ قراطه سرو زرو جوړیږي چې د آلماسو ۳۶۰۰ غمي به ولري. همدارنګه ۲۵ تنه زرګران او د آلماسو متخصصین په ګډه د دې ماسک پر جوړولو کار کوي.

د دغه زرګر په خبره چنایي سوداګر درې غوښتنې لري: ماسک باید د نړۍ تر ټولو قیمتي ماسک وي، د جوړیدو چارې یي باید د دسمبر میاشتې تر ۳۱ نیټې پای ته ورسیږي او همدارنګه د یوه ماسک له پاره ټول اړین ستندردونه باید ولري.

په پام کې نیول شوی ماسک د N99 ماډل د بدلولو وړ فلتر درلودونکی دی چې د کرونا ویروس د مخنوي په خاطر یي سپارښتنه کیږي.

اعلان