د حجاب په اړه د کرزي څرګندونو ته د طالبانو غبرګون | افغانستان | DW | 21.05.2022

د دویچه ویله نوې پاڼه وګورئ

د dw.com بیټا بڼه تر اوسه پورې بشپړه شوې نه ده. ستاسې نظر د دې پاڼي په لا ښه جوړولو کې مرسته کولی شي.

  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
اعلان

افغانستان

د حجاب په اړه د کرزي څرګندونو ته د طالبانو غبرګون

د حجاب په اړه د افغانستان د پخواني ولسمشر حامد کرزي وروستيو څرګندونو ته طالبانو تند غبرګون ښوولی دی. پخواني ولسمشر حامد کرزي د رسنيو له ښځينه ويندويانو غوښتي ول چې د مخ پټولو په هکله د طالبانو وروستی دستور عملي نه کړي.

له سي ان ان امریکايي تلویزیوني شبکې سره د ښځينه ويندويانو په هکله د حامد کرزي وروستيو خبرو، د طالبانو غبرګون راپارولی دی. د طالبانو د امر باالمروف او نهي عن المنکر وزارت په خپله ټويټر پاڼه کې کښلي دي: »د حجاب په اړه د کرزي وينا د تبصرې وړ نه ده. ده په تېرو شلو کلونو کې د بهرنيانو د خوشحالولو له پاره د افغان خويندو هر ډول آزادي غوښتله او زمينه يې ورته برابره کړې ده، خو خپله مېرمن يې لکه څنګه چې نورو ترې غوښتل، په هيڅ کومه رسنۍ کې راڅرګنده نه شوه.«

طالبانو يو ځل بيا پر حجاب ټينګار کړی او هغه يې يو الهي دستور بللی دی. د افغانستان پخواني ولسمشر حامد کرزي له سي ان ان شبکې سره په خپله يوه تازه مرکه کې ويلي چې د تلویزیون پر پرده د خپرونو ښځينه مجريانې دې د طالبانو له خوا د مخ پټولو دستور څخه اطاعت ونه کړي.

نوموړي تاکيد وکړ چې ښځې په افغانستان کې حجاب مراعاتوي، خو د ښځو له خوا د مخ پټول حجاب نه، بلکې د کوم بل هېواد رسم او رواج دی. پخواني ولسمشر په دې مرکه کې ټينګار وکړ چې افغانستان يو اسلامي هېواد دی او د حجاب د څرنګوالي موضوع هم روښانه ده.

سره له دې چې د طالبانو د امر بالمعروف و نهي عن المنکر وزارت تاکيد کړی چې د انځوريزو رسنيو مجریانې بايد سر له نن شنبې (د ۲۰۲۲ کال د می ۲۱مې) څخه خپل مخونه په تصوير کې د راڅرګندېدو پرمهال پټ کړي، خو ځينو ښځينه ويندويانو د طالبانو د دغه دستور اطاعت نه دی کړی. د فرانسې خبري آژانس ليکلي دي چې د ځينو انځوريزو رسنيو ښځينه کارکوونکې د طالبانو د تاکيد سربېره بې د ماسک له اغوستلو څخه په تصوير کې راڅرګندې شوې دي. 

دغه ويندويانې په دې نظر دي چې که د طالبانو دغه دستور ومني، نو طالبان به لا زيات محدوديتونه وضع کړي او د دوی د کار مخه به هم ونيسي. طالبانو دوه ورځې مخکې داسې فرمان صادر کړ چې د انځوریزو رسنيو له ټولو ښځينه ويندويانو څخه يې پکې غوښتي وو چې په تصوير کې د راڅرګندېدو پر مهال دې خپل مخونه پټ کړي. د طالبانو دغه اقدام په ملي او نړيواله کچه هم ګڼ غبرګونونه راپارولي دي.

شکيلا ابراهيم خېل/ن.ص./خ.ح.