د امریکا او طالبانو ترمنځ مذاکرات دریدلي | افغانستان | DW | 13.12.2019
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
اعلان

افغانستان

د امریکا او طالبانو ترمنځ مذاکرات دریدلي

د قطر په پلازمینه دوحه کې د طالبانو او د امریکا متحده ایالاتو ترمنځ د څو ورځو راهیسې روان مذاکرات تر لنډې دمې وروسته بیا پیلیدونکي دي. زلمي خلیلزاد ویلي چې له طالبانو سره یې د بګرام د برید موضوع هم شریکه کړې.

د جمعې په ورځ (د ۲۰۱۹م کال د دسمبر میاشتې په ۱۳مه نیټه) د افغان سولې له پاره د متحده ایالاتو ځانګړي استازي زلمي خلیلزاد ویلي چې د قطر په پلازمینه دوحه کې له طالبانو سره مذاکرات تر څو ورځو وروسته اوس د لنډې «دمې» یا وقفې په حالت کې دي. دغه مذاکرات وروسته له هغې چې په تیره سپتمبر میاشت کې د ولسمشر ترمپ له لوري لغوه شوي وو، د تیرې شنبې په ورځ یو ځل بیا پیل شول.

خلیلزاد په داسې حال کې دغه خبر ورکوي چې د تیرې چهارشنبې په ورځ طالبانو په افغانستان کې د امریکايي ځواکونو په تر ټولو سترې پوځي اډې یعنې بګرام باندې برید وکړ چې په پایله کې یې دوه ملکیان ووژل شول او له ۷۰ ډیر کسان پکې ټپیان شول.

د افغان سولې له پاره د امریکا ځانګړي استازي خلیلزاد پر خپله ټویټر پاڼه باندې د یاد برید په هکله هم غوسه څرګنده کړې او ویلي دي چې «طالبان باید وښيي چې دوی غواړي او د دې وړتیا لري چې د سولې له پاره د افغانانو هیلو ته ځواب ورکړي.» نوموړي په دې ټویټري پیغام کې همدا راز لیکلي: «موږ اوس لنډه دمه اخلو ترڅو دوی له خپلو مشرانو سره پر دغې مهمې مسئلې سلامشورې وکړي.»

په ورته وخت کې په قطر کې د طالبانو د سیاسي دفتر ویاند سهیل شاهین بیا د یادو مذاکراتو په هکله په یوه ټویټري پیغام کې دغه مذاکرات «مثبت او ښه» بللي دي. د روانې اونۍ په پیل کې د طالبانو د سیاسي دفتر ویاند سهیل شاهین له آریانا نیوز تلویزون سره په یوه مرکه کې ویلي وو چې د طالبانو او امریکایانو ترمنځ یو تړون ښايي د دوو اونیو څخه په کمه موده کې لاسلیک شي.

د طالبانو او امریکا ترمنځ د افغان سولې په هکله مذاکرات د ۲۰۱۸م کال په جولای میاشت کې پیل شول. د دواړو لورو ترمنځ د احتمالي توافق له مخې امریکا متحده ایالات اړ دي چې تر توافق وروسته په ۱۳۵ ورځو کې له افغانستان څخه خپل ۵۰۰۰ سرتیري اخراج کړي. سربیره پر دې، د توافق په اساس، طالبان اړ دي چې له افغان حکومت سره مخامخ خبرې وکړي داسې یو اقدام چې طالبانو تر اوسه پورې رد کړی دی. طالبان د افغانستان حکومت د امریکا یو لاسوڅی حکومت ګڼي، خو حکومت بیا د افغانانو په مشرۍ او د افغانانو په مالکیت د سولې پر خبرو ټینګار کوي.

اعلان