«داعش له افغانستانه پر امريکا د بريد اراده لري» | آلمان او نړۍ | DW | 13.06.2019
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
اعلان

آلمان او نړۍ

«داعش له افغانستانه پر امريکا د بريد اراده لري»

يوه لوړ پوړي امريکايي جنرال ويلي چې په افغانستان کې د داعش ډله د امريکا له پاره ډېر «د انديښنې وړ» گواښ دی. زياته شوې چې د امريکا متحده ايالاتو د ترهگرۍ ضد هڅې بايد د دغه ډلې فعاليتونه محدود کړي.

د امريکا متحده ايالاتو د سمندري ځواکونو جنرال فرانک مک کينزی وويل چې سربيره پر دې به هم د داعش له پاره په امريکا کې بريد کول مشکل وي، ځکه چې دغه ډله تر سخت پوځي فشار لاندې ده.

جنرال مک کينزی وويل: «په افغانستان کې داعش ډله يقيناً په امريکا کې د بريد آرزو لري.» نوموړي زياته کړه: «خو زموږ واضح ارزونه داده؛ تر څو چې موږ پر هغوی فشار همداسې وساتو، د بريد په کولو به بريالي نه شي.»

مک کینزی د امريکا متحده ایالاتو د مرکزي قوماندې مشر دی چې په منځني ختیځ کې د امريکا د عملياتو مسئول دی. هغه دا  خبرې په آلمان کې د امريکا په پوځي اډه کې له خبريالانو سره د قطر، عراق، سعودي عربستان، متحده عربي اماراتو او مصر تر سفر وروسته وکړې. نوموړي د خپل سفر په ترڅ  د «ابراهم لنکن» په الوتکې وړونکې بيړۍ کې هم دوه ورځې تېرې کړې وې.

د روانې اوونۍ په پېل کې ایسوشيتد پريس خبري آژانس د امريکايي او افغان امنيتي چارواکو له قوله ويلي چې ول چې داعش په افغانستان کې د خپريدو په حال کې دی او نوي جنگيالي جلبوي او همدا راز په امريکا متحده ايالاتو او لويديځ کې د بريدونو پلانونه جوړوي.

مک کينزی چې د افغانستان او عراق د جگړو يو پخوانی سرتیری دی، وايي چې په دې باور لري چې داعش په افغانستان کې خپلې وړتياوې نه دي پراخې کړي خو د یوه سترې ستونزې په توگه به پاتې وي.

هغه زياته کړه چې د افغانستان په لویديځ کې د داعش مرکز «زموږ له پاره ډېر د انديښنې وړ دی.» نوموړي وويل چې نظامي عمليات د دې ډلې د جنگي صفوفو د له منځه تلو يا کمې باعث شوي نه دي. د اټکلونو پر اساس په افغانستان کې د داعش ډلې د جنگيالو شمير څو زرو ته رسيږي.

bs/sn (AP)

DW.COM

اعلان