حکومت: پیچراګام ولسوالۍ له داعشه پاکه شوې | افغانستان | DW | 13.01.2017
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

حکومت: پیچراګام ولسوالۍ له داعشه پاکه شوې

پوځي چارواکي وايي چې د ننګرهار  په پچیراګام ولسوالۍ کې د داعش ډلې د ځپلو په موخه د افغان ځواکونو پیل شوي عملیات د پنجشنبې په شپه له داعش څخه د دې ولسوالۍ تر پاکیدو وروسته پای ته رسېدلي.

د افغان ځواکونو د شاهین ۲۰ په نوم د داعش د ځپلو دغه پوځي عملیات درې میاشتې وړاندې په پچیراګام ولسوالۍ کې پیل شوي وو.

د افغانستان په ختیځ کې ختیځ کې د ۲۰۱ سیلاب قول اردو ویاند ډګرمن شیرین اقا فقیري، دویچه ویله ته وویل چې اوس یې د چپرهار او پچیراګام ولسوالیو پر لار پنځه د ملي پولیسو او همدا راز په پچیراګام کې ۱۲ د ولسي پاڅون کوونکو پوستې د امنیت خوندیتوب  په موخه جوړې کړي دي.

هغه همدا راز وویل، د هسکې مېنې او پچیراګام ولسوالۍ په منځ سیمه هارون بابا، کې یې د افغان ګډو ځواکونو یوه لویه قرارګاه هم جوړه کړې څو په یادو سیمو کې د حالاتو د ترینګتیا پر مهال نور ځواکونه تقویه کړي.

ښاغلي فقیري زیاته کړه: «په یادو درو میاشتینیو عملیاتو کې له درې سوو ډېر داعش وسلوال وژل شوي او شاوخوا همدومره نور ټپیان دي.»

فقیري وايي چې اوس یې د پچیراګام ولسوالي په بشپړ ډول له داعش څخه پاکه کړې او دغه ډله اوس هلته بریدونه نه شي کولای. په پچیراګام کې د حکومت او داعش ډلې تر منځ په نښتو کې تر ۶۰ ولسي وګړي داعش ډلې له ځانه سره هم بېولي چې لا یې هم مړي، ژوندي نه دی معلوم.

د ننګرهار د والي ویاند عطا الله خوږیاڼي، دویچه ویله ته وویل چې پچیراګام کې د حالاتو د سمون په موخه هلته نوی ولسوال هم ګمارل شوی او په یاده ولسوالۍ کې ۱۳ امنیتي پوستې جوړې شوي.

نوموړي وویل: «پچیراګام کې پنځه سوه کسان د پاڅون کوونکو په تشکیل کې ځای پر ځای شوي چې د امنیت د ښه والي له پاره ګټور تمامېدای شي.»

خو د پچیراګام ولسوالۍ اوسېدونکي له حکومته د نورو امنیتي پوستو د جوړېدو تر څنګ د سیمه ییزو پاڅونوالو په وسلو د سمبالښت غوښتنه کوي. د پاس پچیر یو اوسېدونکي فاروق مازیګر دویچه ویله ته وویل: «که په دې شته ټوپکونو له داعش سره جنګ کېدای شوای نو دې خلکو به ورسره کړی وای. اتلس میاشتې ورسره وجنګېدل خو بیا هم داعش مات نه شو. حکومت دې د نوو پوستو تر څنګ ولسي پاڅونوال په درنو وسلو سمبال کړي.»

خو د پچیراګام ولسوالۍ یوې امنیتې سرچينې د نوم نه ښودلو په شرط دویچه ویله ته وویل، په دغه ولسوالۍ کې د ګډو ځواکونو درې لویې قرارګاوې، پنځه د سیمه ییزو پولیسو او لس د ځايي پاڅونوالو پوستې جوړې شوي، چې ځينو ته درنې وسلې هم ور رسېدلي دي.

د سرچینې په قول حکومتي ځواکونو د پچیراګام ولسوالۍ په پاس او لاندې صبر سیمو کې عملیات نه دي کړي او طالبانو دغو سیمو ته رسیدونې لارې تړلې دي. د سرچينې په وینا په لاندې او پاس صبرونو کې وسلوال طالبان حاکم دي چې لویې قرارګاوې او د جلب، جذب مرکزونه هم لري.

دغې امنیتي سرچینې دا هم وویل چې له داعش ډلې سره تر ۶۰ اسیران لا هم نه دي آزاد شوي چې د مرګ او ژوند په اړه یې معلومات نه شته.

پچیراګام د شینوارو له ولسوالیو وروسته هغه ولسوالي ده، چې داعش ډلې پکې په خپل ټول قوت له حکومتي ځواکونو سره جګړې وکړې خو بالاخره له دغې ولسوالۍ څخه وایستل شول.

DW.COM

اعلان