امريکا غواړي آلمان ته بې پيلوټه الوتکي ورکړي | آلمان او نړۍ | DW | 30.04.2013
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

امريکا غواړي آلمان ته بې پيلوټه الوتکي ورکړي

آیا د آلمان پوځ به په امريکايي جنگي بې پيلوټه الوتکو سمبال سي؟ دا هغه پوښتنه ده چي په دغه هيواد کي ئې ډير بحثونه راپورته کړي دي. خو اوس سياستوال په دې اړه پريکړي ته نژدې سوي دي.

epa03678994 A handout photograph dated 21 June 2008 and made available by the British Ministry of Defence on 27 April 2013 showing a MQ-9 Reaper UAV from British Royal Air Force 39 Squadron waiting before taking off into the nights sky above Afghanistan. The British Ministry of Defence reports on 27 April 2013 that the British Royal Air Force has operated Reaper drones remotely controlled from RAF Waddington, Lincolnshire, England. They further state that the drones are currently being used for surveillance but could be called on to use their weapon systems if needed. EPA/SAC ANDREW MORRIS / BRITISH MINISTRY OF DEFENCE / HANDOUT MANDATORY CREDIT: CROWN COPYRIGHT HANDOUT EDITORIAL USE ONLY/NO SALES

Drohne MQ-9 Reaper der British Royal Air Force Archivbild

د «شپېگل انلاين» د يوه راپور له مخي د امريکا متحده ايالات ترڅو مياشتو آزموينو وروسته اوس غواړي چي آلمان ته جنگي بې پيلوټه الوتکي صادري کړي.

شپيگل د آلمان د دفاع وزارت د يوه چارواکي په حواله ليکي دي چي په برلين کي په سياسي کړيو کي د مقدماتي غوښتنو له مخي داسي معلوميږي، چي دغه هيواد به د درو جنگي بې پيلوټه الوتکو «Reaper» او د ځمکي د څلورو مرکزونو له پاره د می د مياشتي په لومړيو کي امريکا متحده ايالاتو ته مثبت جواب ورکړي.

د امريکا متحده ايالاتو کانگرس د اپريل د مياشتي پر ۱۰ نېټه لا آلمان ته زرغون چراغ لگولی وو. د آلمان د دفاع وزير توماس ديميزیر د سه شنبې په ورځ (۲۰۱۳ کال د اپريل د میاشتې ۳۰ نېټه) په واشنگټن کي له خپل امريکايي سيال چاک هېگل، سره گوري. په دغه ليدنه کتنه کي کيدای سي پر دې موضوع باندي هم خبري وسي.

خو د آلمان د دفاع وزير د دوشنبې په ماښام په نيويارک کي د «ويست پوينت» په پوځي اکاډمۍ کي د خبرو پرمهال وويل، چي تر اوسه پوري د امريکايانو له خوا موږ ته جواب نه دی رارسېدلی.

آلمان ته د «Reaper» او «Predator B» جنگي بې پيلوټه الوتکو د صادرولو مقدماتي غوښتني د ۲۰۱۲ کال په لومړيو کي سوي وې. له دغه ډول الوتکو څخه اوس له افغانستان سره د پاکستان په سرحد کي د ياغيانو د ځپلو له پاره کار اخيستل کيږي.

شپيگل انلاين ليکي چي د آلمان د دفاع وزارت له پاره د بې پيلوټه الوتکو د خريدارۍ يو بل بديل د اسرائيلو «Heron TP» ماډل الوتکي دي. خو دغه الوتکي د امريکايي الوتکو په پرتله مجهزي نه دي.

د آلمان د دفاع وزارت اوس په افغانستان کي د «Heron 1» ډوله بې پيلوټه الوتکي چي وسلې نه لري او يوازي کشف کوي، کار اخلي. خو د بې پيلوټه الوتکو دغه ماموريت په ۲۰۱۴ کال کي پای ته رسيږي.

په واشنگټن کي به د آلمان د دفاع د وزير توماس ديميزير د خبرو بله موضوع په افغانستان کي نوی ماموريت وي. آلمان څو ورځي دمخه اعلان وکړ، چي تر ۲۰۱۴ کال وروسته به په افغانستان کي له ۶۰۰ څخه تر ۸۰۰ تنو سرتيري پريږدي، چي هلته به د افغان امنيتي ځواک په روزلو کي ونډه واخلي.

د امريکا متحده ايالاتو تر اوسه پوري په دې اړه چي په افغانستان کي به په څه تعداد عسکر پريږدي کومي پريکړي ته نه دي رسېدلي.

اعلان