افغان سیاستوال بیا له طالبان سره غونډه کوي؛ دا ځل چین کوربه دی | آلمان او نړۍ | DW | 23.10.2019
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
اعلان

آلمان او نړۍ

افغان سیاستوال بیا له طالبان سره غونډه کوي؛ دا ځل چین کوربه دی

د امریکا او طالبانو تر منځ د مذاکرات تر لغوه کیدو وروسته، چین د طالبانو او افغان سیاسي مشرانو د کوربتوب له پاره چمتوالی نیسي. تیره میاشت د طالبانو یوه پلاوي هم له چینايي چارواکو سره په دې هیواد کې لیدلي وو.

وروسته له هغې چې د امریکا متحده ایالاتو ولسمشر دونالد ترمپ، له طالبانو سره مذاکرات لغوه اعلان کړل، چین اوس د افغانستان د شخړې د مختلفو اړخونو د کوربتوب له پاره چمتوالی نیسي. د دې کار هدف د افغانستان د اوږدې جګړې د پای له پاره د حل لار لټول په ګوته شوی دی.

چین چې له افغانستان سره لنډه ګډه پوله لري، له یوې مودې راهیسې طالبان د سولې خبرو ته هڅوي او په دې ترڅ کې د طالبانو یوه لوړپوړي پلاوي تیره میاشت له دغه هیواد څخه لیدنه هم کړې وه. په دغه ملاقات کې د طالبانو استازو له یو شمیر چینايي حکومتي چارواکو سره لیدنې کړې وې.

د سې شنبې په ورځ (د ۲۰۱۹م کال د اکتوبر میاشتې په ۲۲مه نیټه) په قطر کې د طالبانو د سیاسي دفتر ویاند سهیل شاهین په یوه ټویټري پیغام کې لیکلي: «د چین هیواد د محترم ملا برادر اخند په مشرۍ د امارت [د طالبانو] یو لوی هئیت ته په کنفرانس کې د ګډون بلنه ورکړې.»

شاهین زیاته کړې ده چې په چین کې ترسره کیدونکې لیدنه کتنه به د مسکو د غونډو دوام وي چې ګډون وال به یې د سولې په اړه له شخصي موقف څخه خپل نظرونه شریکوي. هغه ویلي: «یاد کنفرانس په مسکو او دوحه کې د شویو کنفرانسونو لړۍ ده. ټول ګډونوال په شخصي توګه ګډون کوي او د افغانستان د مسلې د حل د لارو په اړه خپل شخصي نظرونه شریکوي.»

طالبان خپله ډله د امارت په نوم یادوي خو افغان حکومت او نړیواله ټولنه یې په دې نوم په رسمیت نه پیژني.

شاهین لا تر اوسه پورې د چین د غونډې د تاریخ په هکله معلومات نه دي وړاندې کړي او په کابل کې د چین سفارت هم په دې برخه کې د تبصرې له پاره چمتو نه وو. په عین وخت کې د افغانستان د بهرنیو چارو وزارت مرستیال ادریس زمان، بیا ویلي چې افغان حکومت د چین له لوري د دغو خبرو د کوربتوب په هکله معلومات درلودل خو په دې هکله یې له تبصرې ډډه وکړه.

د پخواني ولسمشر حامد کرزي یوه ویاند د چین د ناستې په هکله وویل چې د کرزي دفتر هم د دغې ناستې په هکله معلومات لري او دا چې د دعوت په صورت کې پخوانی ولسمشر حامد کرزی به هم په کې ګډون وکړي. حامد کرزي د روان کال په فبروري میاشت کې د مسکو په کوربتوب له طالبانو سره په دغه راز یوې بلې ناسته کې هم حاضر وو.

د مسکو تر بین الافغاني ډیالوګ وروسته، د روان کال په جولای میاشت کې د حکومتي چارواکو، د مدني ټولنې د استازو او یو شمیر سیاسي څیرو په ګډون یوه ۶۰ کسیزه پلاوي د قطر په پلازمینه دوحه کې له طالبانو سره دې ته ورته یوه بله غونډه درلوده.

 

اعلان