اردوغان: د افغانستان د ثبات ساتلو له پاره ترکيه د اعتماد وړ هيواد دی | افغانستان | DW | 14.06.2021
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
اعلان

افغانستان

اردوغان: د افغانستان د ثبات ساتلو له پاره ترکيه د اعتماد وړ هيواد دی

د ترکيې جمهور رئيس ويلي دي چي د بهرنيو ځواکونو تر وتلو وروسته په افغانستان کي د ثبات ساتلو له پاره کيدای سي ترکيه يوازنی «د اعتماد وړ» هيواد وي. هغه په دې سره واشنګټن ته اشاره رسوي چي کولای سي پر انقرې حساب وکړي.

اردوغان ويلي دي چي د دوشنبې په ورځ (۲۰۲۱م کال د می ۱۴) په بروکسل کي له جوبايدن سره په لومړيو مخامخ خبرو کي به په دې اړه هم خبري وکړي. په وروستيو کلونو کي د ترکيې او امریکا متحده ايالاتو ترمنځ اړيکي خړي پړي دي.

د ترکيې جمهور رئيس د يکشنبې په ورځ بروکسل ته د سفر پرمهال د استانبول په هوايي ډګر کي خبريالانو ته وويل: «امريکا ډېر ژر له افغانستان څخه وتلو ته تياری نيسي، او له هغي شېبې څخه چي هغوی ووځي، روښانه ده چي په افغانستان کي د پروسو د جاري ساتلو له پاره يوازینی د اعتماد وړ هيواد ترکيه دی.»

امريکا متحده ايالات او ناټو له افغانستان څخه د خپلو ځواکونو د ايستلو په وروستۍ مرحله کي دي او په پام کي ده چي دغه پروسه د روان کال د سپتمبر مياشتي تر ۱۱نېټې پوري بشپړه سي.

د راپورونو له مخي ترکيې تياری ښوولی چي د کابل نړيوال هوايي ډګر د امنيت ساتلو له پاره خپل ځواکونه هلته پريږدي. که په افغانستان امنيتي وضعيت نور هم خراب سي، له دغه هيواده د بهرنيو ديپلوماتانو د وتلو يوازینۍ لار د کابل هوايي ډګر دی.

اردوغان بې له دې چي جزئيات وړاندي کړي وويل چي د ترکيې چارواکو خپلو امريکايي سيالانو ته د بهرنيو ځواکونو تر وتلو وروسته د افغانستان په اړه د انقرې د طرحې په اړه معلومات ورکړي دي.

د ترکيې جمهور رئيس وويل چي امريکايان له دغي طرحي څخه «راضي دي. موږ به په دې وتوانيږو چي له هغوی سره د افغانستان په اړه بحث وکړو».

په دي سره ترکيې په افغانستان کي د پاتيدلو موخه روښانه کړې ده، خو د دغي طرحي جزئيات تر اوسه پوري لا خپاره سوي نه دي.

يوه ترکي چارواکي ويلي دي چي ځواکونه به هغه وخت هلته پاته سي چي «يو لړ معلوم شرايط د قانوني او مالي امکاناتو په ګدون ورته برابر وي».

دغه چارواکي چي نه يې غوښتل نوم يې واخيستل سي، زياته کړې ده: «که ترکيه په افغانستان کي پاته سي، په کوم چوکاټ کي پاتيږي؟ د ناټو که دوه اړخيزو شرايطو په چوکاټ کي؟ که دغه حضور د ناټو په مرسته او همکارۍ وي، د کوم جواز له مخي؟»

دغه چارواکي دغه راز منلې ده چي غربي چارواکي د دې پلوي کوي چي د ترکيې ځواکونه دي د کابل نړيوال هوايي ډګر امنيت وساتي. خو هغه زیاته کړه: «کله چي نور څوک ملاتړ نه کوي، ولي ترکيه سخت کار وکړي؟ دغه موضوعات بايد روښانه سي.»

د کابل د نړيوال هوايي ډګر د امنيت ساتلو پرسر د راپورونو تر خپريدو وروسته طالبانو ويلي دي چي ټول بهرني ځواکونه بايد له افغانستان څخه ووځي. دغي ډلي ويلي دي چي د کابل د هوايي ډګر او سفارتونو د امنيت ساتلو مسؤليت د افغانانو دی.

DW.COM