آلماني سرتیري له کندز څخه په بشپړ ډول ووتل | افغانستان | DW | 20.10.2013
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

آلماني سرتیري له کندز څخه په بشپړ ډول ووتل

آلماني ځواکونه په کندز کې د یوې لسیزي ماموریت د تر سره کولو وروسته له دغه ولایت څخه په بشپړ ډول ووتل. دغه اقدام ته له افغانستان څخه د ناټو ځواکونو د راوتلو په ترڅ کې د یوه مهم گام په توگه کتل کیږي.

په کندز ولایت کې د آلماني ځواکونو د ځای پر ځای کیدو یوه لسیزه وروسته، آلماني پوځ د شنبې په ورځ (د ۲۰۱۳م کال د اکتوبر ۱۹مه) په دغه ولایت کې د خپل پوځي ماموریت پای ته د رسیدو اعلان وکړ.

په کندز کې د آلماني ځواکونو قوماندان هایکو ډیل، په مزار شریف کې د آلماني ځواکو عمومي مقر ته د رسیدو وروسته وویل: «موږ په بریا سره د [راوتلو] ماموریت بشپړ کړ.»

له کندز ولایت څخه د آلماني ځواکونو وتل، د ناټو په مشرۍ د افغانستان په شمال کې د ایساف د سیمه ییزو ځواکونو د قوماندان یورگ فولمېر، له لوري هم تائید شوي دي: «موږ ټول کولای شو په هغه څه وویاړو چې زموږ سرتیرو په کندز کې تر وروستۍ شیبې پورې تر سره کړل.»

د آلمان پوځ د کندز د پوځي اډې چارې د اکتوبر د میاشتې پر شپږمه نیټه افغان ځواکونو ته سپارلې وې، خو د لوژیستیکي چارو بشپړیدو یو څه دوام وکړ. آلماني ځواکونه د شنبې په سهار مزار شریف ته ورسیدل.

د ۱۱۹ موټرو کتار سره چې په کې پیاده جنگي نقلیه وسایط هم شامل وو، ۴۴۱ سرتیرو ۳۰۰ کیلومتره لاره په دوو شپو کې ووهله.

د اکتوبر د میاشتې پر شپږمه نیټه، افغاني ځواکونو ته د کندز د پوځې اډې د سپارلو په مراسمو کې د آلمان د دفاع وزیر توماس دیمیزیز او د بهرنیو چارو وزیر گیدو ویسترویله هم گډون کړی وو.

لا هم د ملاتړي نقش انتظار کیږي

له کندز څخه د آلماني ځواکونو تر وتلو وروسته، په مزار شریف کې د آلماني ځواکونو پوځي مقر په یوه لوی مقر باندې واوښت. له دې سره سره په بیړنیو حالاتو کې په کندز ولایت کې د افغان امنیتي ځواکونو د ملاتړ له پاره د ۳۰۰ آلماني سرتیرو ماموریت امکان لري. په دغه ځای کې په وروستیو میاشتو کې امنیتي وضعیت خراب شوی دی.

په کندز کې د آلمان د اردو ماموریت پوره لس کاله دوام وکړ. دغه ولایت ته لومړني آلماني سرتیري د ۲۰۰۳م کال د اکتوبر د میاشتې پر ۲۵مه نیټه وررسیدلي وو. په کندز ولایت او د هغې په گاونډي ولایت بغلان کې د آلماني سرتیرو حضور د نورو سیمو په پرتله د دغه ځواکونو له پاره خطرناک او له مرگ ژوبلې سره مل وو.

په اوسني وخت کې په افغانستان کې ۳۸۰۰ آلماني سرتیري حضور لري. په افغانستان کې د آلماني ځواکونو شمیر په ځانگړو شرایطو کې ۵۳۵۰ سرتیرو ته رسیدلی وو. یو وخت په کندز ولایت کې د آلماني سرتیرو شمیر ۱۴۲۰ تنه وو.

د امریکا متحده ایالاتو او بریتانیې وروسته آلمان د ایساف د ماموریت په چوکاټ کې ډیر سرتیري په دنده گمارلي دي. په پام کې ده چې د ۲۰۱۴م کال تر پایه په افغانستان کې د دغه ځواکونو جنگي ماموریت پاې ته ورسیږي او په دغه هیواد کې د بهرنیو ځواکونو روزنیز او مشورتي ماموریت ته لاره هواره شي.

اعلان