په روزگان کي د ملکي وگړو دوه موټره پر ماينونو ختلي
۱۳۹۴ خرداد ۲۶, سهشنبه
د رزوګان د والي ویاند دوست محمد نایاب دویچه ویله پښتو څانګي ته د پيښي د پخلي ترڅنګ وویل، چي په دې چاودونو کي ۳ ملکي کسان وژل سوي او ۱۶ نور ټپیان دي.
نایاب وايي دواړه موټره له کندهار څخه د دایکنډي ولایت کجران ولسوالۍ ته روان ول، چي په لاره کي پر ښخ سوو ماينونو برابر سوي دي. د هغه په قول، په وژل سويو او ټپیانو کي ښځي او کوچنیان هم شامل دي.
د پيښي قربانیان د روزګان مرکزي روغتون ته لېږدول سوي او هلته یو تن ډاکټر د نوم نه ښوولو په شرط دويچه ويله پښتو څانګي ته وویل، چي دوی ته له یادي پيښي څخه ۳ جسدونه او ۱۶ ټپیان ور وړل سوي دی.
د ډاکټر په قول، په ټپیانو کي د ۴ تنو روغتیايي حالت د اندېښنې وړ دی، چي دامهال تر بېړنیو روغتیايي مرستو لاندي دي.
د پيښي مسئوليت تر اوسه پوري چا پرغاړه نه دی اخيستی، خو د روزگان ولايت چارواکي وايي چي دا کار د دوی د وسله والو مخالفانو دی.
په افغانستان کي دغه شان پيښو عام وگړي سخت په غوسه کړي دي. خلک وايي، هره میاشت په لسونو انسانان د سړک د غاړي په ښخ سویو ماینونو کي قرباني کیږي.