مصری ميلياردر: مهاجرو ته په يونان کي يو ټاپو رانيسم

مصري ميلياردر نجيب انسی ساويرس، د آلمان له شپېگل ويبسايت سره په مرکه کي پر خپلي هغي ژمني ټينگار کړی دئ، چي د مهاجرو له پاره په مديترانه درياب کي يو ټاپو رانيسي او په دې لاره کي د اروپا د سياستوالو مرستي ته اړتيا لري.

هغه ويلي دي چي د دغي جزيرې د رانيولو له پاره تيار دی چي ۲۰۰ ميليونه ډالره ورکړي.

ساويرس ويلي دي چي په خپله انجينر دئ، تجهيزات هم په اختيار کي لري او پوهيږي چي څرنگه يو ښارگوټی جوړ کړي، څو مهاجر پکښې ځای پر ځای کړي.

هغه ويلي دي چي په دغه ټاپو کي به لږ تر لږه ۱۰۰ زره کسان ځای پر ځای کړي او پر ښوونځي او روغتون سربيره به د ژوندانه ټول امکانات ورته برابر کړي.

د هغي پوښتني په جواب کي چي دې کار ته ئې د اقدام انگېزه څه وه؟ ساويرس وويل: «د ترکيې په ساحل کي د درې کلن سوريايي هلک مړی د خدای له خوا زموږ د بيدارۍ نخښه وه.»

دغه درې کلن هلک چي اروپا ته د مهاجرت پر مهال په اوبو کي ډوب سوی وو او د ترکيې د يوه ساحل پرغاړه ئې مړی وموندل سو نه يوازي ساويرس، بلکي ټولي نړۍ ته تکان ور کړ.

مصري ميلياردر نجيب انسی ساويرس ويلي دي: «که يونان يا ايتاليا يو ټاپو راباندي خرڅ کړي، زه به هغه د مهاجرو په اختيار کي ورکړم او په نوي وطن کي به ئې د کار زمينه ورته برابري کړم.»