بروکسل: د افغانستان ماموریت د ناټو او روسیې په ګټه دئ
۱۳۹۰ آذر ۱۷, پنجشنبه
دغه پریکړه تیره ورځ «چهار شنبه» په بروکسل کي وشوه. د هغوئ دغه غونډه به نن هم دوام وکړي. په ننۍ غونډه کي په اروپا کي د دفاعي ډال او په کوسووا کي د ناټو ماموریت پر سر هم بحث کیږی.
اوس دا خبره په بشپړه توګه روښانه ده چي په افغانستان کي د ناټو ماموریت باید په بشپړه توګه پای ته ورسیږي. د ۲۰۱۴ کال تر پايه ، د ناټو غړو هیوادونو ټول جنګي سرتیري بايد له افغانستان څخه ووزي . خوا دا د دې معنا نه لري چي ناټو له دې هیواد څخه په بشپړه توګه ورکیږي.
د ناتو عمومی منشی، اندرس فوګ راسموسن، په بروکسل کي د غونډي برخه والو ته د بن په کنفرانس کي د نړیوالي ټولني د پریکړي یادونه وکړه:
«د اونۍ په پیل کي د بن په کنفرانس کي نړیوالي ټولني له افغانستان سره د اوږد مهال ملاتړ ژمنه وکړه. په دې برخه کي به ناټو خپله بشپړه ونډه ولري. موږ به په دې هکله غور وکړو چي تر ۲۰۱۴ کال وروسته له افغانستان سره د اوږد مهال مشارکت په چوکاټ کي څه کولای شو.»
په بروکسل کي د ناتو د بهرینو چارو وزیرانو د غونډي بله مهمه موضوع په اروپا کي د ناټو د دفاعي ډال د جوړیدو په اړه له روسيې سره د تیرو ورځو شخړه وه. روسیه وایي چي هغه له داسي يو دفاعی ډال څخه بيره لري او په همدې وجه یې پریګړه کړي چي د اروپا يي اتحادیې پر پوله، کالیننګراد کي یو مقابل دفاعي ډال جوړ کړئ.
د ناټو عمومي منشې، اندرس فوک راس موسن، د روسیې دا تصمیم «د بې ځایه پیسو د لګولو» په نامه یاد کړ. ناټو وایي چي د هغوئ دفاعي ډال د روسيې پر ضد نه دئ، او په همدې وجه روسيې ته دا اجازه هم نه ورکوي، چي د ناټو د پلان مخه ونیسي.
خو ناټو په عین وخت کي د روسيې همکاریو ته هم اړتیا لري. د بیلګي په توګه د روسیې له لاري افغانستان ته د پوځي اکمالاتو د استولو په برخه کي. اوس پوښتنه دا ده چي آیا په دې برخه کي به د هغوئ تر منځ یو ډول تبادله یې معامله وشي؟ دې پوښتنې ته د ناروې د بهرنیو چارو وزیر، یوناس ګار شتوری، جواب ورکړئ:
«زما په نظر سړۍ باید داسي یو څه یو له بل سره ونه تړي چي هغه هيڅ تړاو سره و نه لري. دا د ناټو او روسیې دواړو په ګټه ده چي په افغانستان کي روان پوځي عملیات دوام پیدا کړي او د امینتي مسئولیت د انتقال پروسه د ناټو له خوا بشپړه شي. په دې اړه موږ دوې ورځي مخکي په بن کي په ښکاره توګه فیصله وکړه.»
په اروپا کي د ناتو د دفاعي ډال د جوړولو پر مسئلې باندي نن د ناتو او روسیې په ګډه شورا کي بحث او خبري کیږي.
سره بیره پر دې د ناټو د بهرنیو چارو د وزیرانو په ننۍ غونډه کي د بحث بله موضوع په کوسووا کي د ناټو ماموریت دئ.
د آلمان د بهرنیو چارو وزیر، ګیدو ويستر ویله، د کوسووا په شمال کي د ناټو پر سرتیرو باندي د نومبر په پای کي د صربیانو حمله یو ځل بیا وغندله. په دې حمله کي آلماني سرتیري هم ټپیان شول.
په کوسووا کي د ناټو پر دغو سرتیرو هغه وخت حمله وشوه، چي هغوئ غوښتل د کوسووا په شمال کي د صربیانو له خوا یو تړل شوئ سړک بیرته پرانيزي. ناټو اوس غواړي چي په دغه سیمه کي میشت صربیان باید ټول سړکونه پرانیستي پريږدي.
آژانسونه/ عبدالباري حکیم
کتونکی: مسعود جهش