Шпански суд ги формализираше обвиненијата против принцезата Кристина
25 јуни 2014Со овој судски процес дополнително ќе биде нарушен угледот на шпанското кралско семејство. Судот во Палма де Мајорка ги потврди обвиненијата за даночна измама и перење пари против шпанската принцеза Кристина. Ова е еден од последните чекори пред отворањето на судската постапка. Судот, како што пренесе агенцијата Ројтерс, информира дека ги формализира обвиненијата за принцезата и нејзиниот сопруг.
Принцезата Кристина е обвинета за соучесништво во матните бизниси на нејзиниот сопруг, поранешниот олимписки ракометен играч Ињаки Урдангарин. Тој е обвинет за проневера на неколку милиони евра од јавни фондови, а во судскиот процес во фокусот ќе бидат неговите бизнис договори.
Одлуката на судот во Палма де Мајорка доаѓа на речиси една недела откако на шпанскиот трон седна Фелипе Шести, откако неговиот татко Хуан Карлос абдицираше. Тоа беше потег за подобрување на нарушениот имиџ на шпанската монархија во време на економска криза. Судскиот процес против сестрата на новиот шпански крал може дополнително да го расипе имиџот на шпанското кралско семејство.