Филмски фестивал во Кан по 70. пат
Кремот на меѓународната филмска индустрија по 70. пат се собира во францускиот Кан. Во трката за Златната палма е и еден германски филм. Има и други изненадувања
Фестивалскиот плакат ги зовре страстите
Возбудата околу плакатот на фестивалот полека се смирува пред отворањето на 17 мај. На него е ретуширана фотографија, стара 60 години, на Клаудија Кардинале. Дискусиите кои ги предизвика фотографијата всушност беа дел од дебатата за преслабите манекенки во Франција.
Француско отворање
Во центарот на вниманието на отворањето се две француски актерки, Марион Котијар и Шарлот Гејнзбург, кои се дел од екипата на „Духовите на Исмаел“- филм на Арно Деплешан. Во филмот е прикажана судбината на еден човек (Матје Амалрик) кој не може да ја прежали загубата на љубената. Филмот се прикажува вон конкуренција.
Приватниот живот на легендарниот режисер
Во конкуренција за Златната палма се 18 филмови. Особено голем интерес привлекува новиот филм на Мишел Азанависијус „Бележит“ во кој се раскажува врската меѓу познатиот режисер Жан- Лик Годар и актерката Ане Вјаземски.
Во конкуренција и Фатих Акин
Германскиот филм во Кан се вика „Од ништо“ и е дело на Фатих Акин, а главната улога ја толкува холивудската ѕвезда Дајан Кругер. По минатогодишниот успех на „Тони Ердман“, од Акин се очекува да продолжи по тој пат.
Михаел Ханеке повторно на подиумот?
Михаел Ханеке може да стане првиот режисер во историјата на фестивалот кој три пати ја освоил Златната палма. Новиот филм на австрискиот режисер се вика „Хепиенд“, а водечките улоги ги имаат Изабел Ипер и Жан-Луј Трентињан.
Златната палма повредна од било кога
За јубилејното 70. издание на фестивалот, организаторите се потрудија наградата да изгледа посебно- годинава трофејот не само што ќе ги задржи „стандардните“ 118 грама злато, туку на тоа се додадени и 167 дијаманти. Севкупната вредност- околу 20 илјади евра.
Одлучува Педро Алмодовар
Годинава, жирито го предводи шпанскиот режисер Педро Алмодовар. Во осумчленото жири кое треба да го одлучи победникот седат и германската режисерка Марен Аде, нејзиниот италијански колега Паоло Сорентино и американската актерка Џесика Честејн.
Полански во Кан
Легендарниот Роман Полански ќе го прикаже својот нов филм „Базирано на вистинита приказна“ вон конкуренција. Психо-трилерот ќе биде прикажан на крајот на фестивалот.
Новиот филм на Клод Ланзман
Клод Ланзман е легенда на документарната режија. Сега има 91 година, филмот кој го презентира во Кан се вика „Напалм“ и ја раскажува историјата на Северна Кореја. Тој е еден од бројните политички филмови кои се прикажуваат годинава.
Поглед во историјата
Во програмата „Класици“ се прикажуваат најуспешните филмови од последните децении. Меѓу нив е и „Зголемување“ на Микеланџело Антонини.
И ТВ сериите најдоа свое место
Годинава, Кан го прави она што некои други фестивали го започнаа одамна: прикажува и серии. Светска премиера ќе имаат двете нови продолженија на култната серија на Дејвид Линч: „Твин пикс“.
Нова „реалност“ во Кан
За првпат на фестивалот ќе биде прикажан филм работен во техника на виртуелна реалност. Се работи за дело на мексиканскиот режисер „Месо и Арена“ во траење од 6 минути, кое ја раскажува приказната за бегалците во централна и северна Америка.