Среќни во изолација: Каде во светот нема коронавирус

Микродржавата Палау со 18 илјади жители е меѓу малкуте преостанати места на Земјата каде не е пријавен ниту еден случај болеста Ковид-19, додека бројот на заразени расте насекаде. Во оваа група спаѓаат уште и Самоа, Туркменистан, Северна Кореја и неколку бази на замрзнатиот континент Антарктик.
Точка во океанот на стотици километри од најблиските соседи, Палау е опкружен со огромниот Тихи океан, кој е некој вид заштита од вирусот.
Покрај стриктните ограничувања на патувањата, тоа засега ја задржува заразата за бројни нации како Тонга, Соломонските острови, Маршаловите острови и Микронезија.
Но ни оддалеченоста не е гаранција за запирање на незадржливиот марш на новата болест. Островите Северна Маријана викендов ги пријавија првите случаи, а по нив и првиот смртен случај.

Единствениот континент без коронавирус
Кламиокл Тулоп, 28-годишна уметничка и самохрана мајка, се надева дека Палау ќе ја избегне судбината на Вухан, Мадрид или Њујорк- каде и далеку подобри здравствени системи беа прегазени од вирусот. Но таа го опишува засиленото чувство на страв дека вирусот доаѓа или дека веќе пристигнал неоткриен.
„Можете да почувствувате како растат тензијата и стравот и при купувањето. Продавниците се преполни дури и во недели кога не се исплаќаат плати“, вели таа. 

- Една третина од светското население во карантин

Во австралиските бази на Антарктикот, околу 90 луѓе се единствените жители на единствениот континент без коронавирус. Во бескрајната тундра во која престојуваат нема потреба ниту од социјално дистанцирање.
„Тие се веројатно единствените Австралијанци кои можат да вечераат заедно, да отидат во бар или во вежбална“, вели менаџерот на антарктичките операции Роб Клифтон. Овие бази ќе останат изолирани до ноември, па истражувачите се безбедни, но Клифтон признава дека нивната најголема грижа се нивните најблиски кои останале во домовите.

Ако „нема“, не значи и дека нема

Во некои земји, тоа што нема пријавени случаи не значи дека такви навистина и не постојат.
Северна Кореја веќе ги прогласи своите вонредни мерки за неверојатен успех во битката против Ковид-19, и покрај тоа што епидемијата беснее во соседните Кина и Јужна Кореја. Но државните медиуми веќе објавија манипулирани фотографии од обични граѓани со заштитни маски, па скептиците сметаат дека комунистичката влада веројатно не ја кажува целата вистина.
И Туркменистан на оригинален начин „се бори“ против пандемијата. Во оваа авторитарна централно-азиска држава деновиве беше забрането споменувањето на коронавирусот.
„Медиумите под контрола на државата повеќе не смеат да го користат зборот“, соопштија Репортери без граници. Дополнително, властите им се закануваат на граѓаните кои јавно зборуваат за коронавирусот со апсење.