Сезоната на божиќните панаѓури во Германија во полн ек
Разгледувањето шарени штандови со чаша варено вино во рака, слушање божиќни песни и барање божиќни подароци - тоа во наредните недели ќе биде „задолжителна програма“ за сите кои сакаат да прошетаат во град.
Многумина веќе му се радуваат на Божик
Варено вино и големо панорамско тркало: во Диселдорф божиќниот пазар е отворен уште од 17. ноември. Оние кои се возат во гондолите на огромното панорамско тркало во забавниот парк поминуваат низ две „климатски зони“: на највисоката точка од конструкцијата обично вее студен ветер и температурата е забележитено пониска отколку на земја.
Добра забава за големи и мали
Подолу од Диселдорф по течението на Рајна, божиќните пазари беа отворени малку подоцна - на 21. ноември. На оние во Келн на кои не им е доволна само забава на божиќните пазарчиња, на располагање им стои и лизгалиште. Во овој град има повеќе божиќни пазари на многу локации. Ги посетуваат илјадници туристи.
Во воздухот се чувствува љубов
Дречливи и шарени декорации се дел од прајд-пазарите, како што е овој во Хамбург. Оној кој бара необичен подарок, сигурно ќе најде нешто „откачено“ на најголемиот геј-лезбејски божиќен пазар во северна Германија. Тука има и бина на која, посебно за викендите, се изведуваат шарени програми.
Божиќна магија
Имињата на божиќните пазари се многу различни. Но, она што го нудат е главно исто. Украси за елка, свеќници и украси со сцени од раѓањето на Исус - од традиционални па сѐ до модерни изведби - можат да се најдат на божиќните пазари во Берлин. Многу сопственици на продавници со украси имат свои штандови во повеќе градови.
Вака мириса Божик
Тука во воздухот се чувствува мирис на варено вино, колачи од мед и шеќерна волна. Оние кои се љубители на овие деликатеси ќе можат да ги купат и по Божик. На берлинскиот плоштад Жандарменмаркт божиќниот пазар е отворен до Нова година. Оние кои го сакаат мирисот на божиќните пазари, можат да купат бадеми со цимет и шеќер - убаво мирисаат во дневната соба.
Сјајот на некогашниот главен град
Кога ќе падне мрак, на божиќните пазари се палат светлата. Во Бон импресивно изгледа големата дрвена пирамида, модел направен според една мелница од планинскиот регион Ерцгебирге.
Уметноста на дрводелците
Во пријатна атмосфера, посебна атракција претставуваат овие традиционални дела на дрводелците од Ерцгебирге. Луѓето нивните фигури со задоволство ги купуваат за подароци. Инаку, на божиќните пазари важи златното правило: паричникот мора да биде добро сокриен во внатрешните џебови - на овие пазари џепчиите се особено активни.