Северен тек 1: Путин сигнализира повторен старт на гасоводот

Наспроти стравувањата дека Русија по ремонтот на Северен тек 1 веќе нема да ја отвора славината за гас, шефот на Кремљ сигнализира повторен рестарт на гасоводот. „Гаспром ги исполнува своите обврски, секогаш ги исполнувал и сака и натаму да ги исполнува сите свои обврски“, изјави рускиот претседател Владимир Путин во текот на ноќта (19/20.07). Путин истовремено предупреди од натамошно намалување на количеството на гас кое ќе се транспортира преку гасоводот.

Доколку Русија не ја добие назад турбината која беше поправена во Канада, на крајот на јули капацитетот на гасоводот би можел значително да се намали, ги пренесува зборовите на Путин руската агенција Тас. Според најавите, капацитетот би можел да падне на една петтина од количеството кое вообичаено се транспортира преку гасоводот.

Рускиот претседател истовремено предложи со работа да почне гасоводот Северен тек 2. „Имаме уште една готова траса - тоа е Северен тек 2. Таа може да биде пуштена во употреба“, изјави Путин.

Гасоводот Северен тек 1 беше пуштен во употреба во 2011 година и има капацитет од околу 55 милијарди кубни метри годишно. Од јуни рускиот државен енергетски концерн Гаспром ја намали испораката на гас за Германија за повеќе од половина од дневниот максимум - на 67 милиони кубни метри.

- повеќе: ЕК не очекува повторен старт на гасоводот Северен тек 1 неделава

Гасоводот во моментов е целосно исклучен поради годишен ремонт, како што е планирано до четврток (21.07). Инспекцијата на гасоводот, како што се вели од Северен тек АГ, минала без проблеми и нема пречки од утре повторно да почне да се транспортира гас.