1. Прескокни до содржината
  2. Прескокни до главната навигација
  3. Кон други страници на DW

Американската граница останува затворена за Европејците

Сузане Ајкенфондер
27 јули 2021

Надежите дека Американците наскоро ќе ги разлабават рестрикциите за влез на Европејци не се остварија. За тоа има причина, велат од Вашингтон.

https://p.dw.com/p/3y6gs
USA Symbolbild Einreise
Фотографија: Shawn Thew/EPA/picture alliance

САД и натаму не дозволуваат влез во земјата на Европејци и други странци. „Поради Делта варијантата ќе ги задржиме важечките ограничувања на патувањето“, соопшти портпаролката на Белата куќа, Џен Псаки.

Бројот на заразени со коронавирус се зголемува, пред сѐ во групата на невакцинирани, објасни таа. „И, се чини веројатно дека тоа ќе продолжи во наредните недели.“

Делта сојот е во меѓувреме доминантен во САД, но тоа не значи дека би бил вистински чекор во земјата да има повеќе луѓе инфицирани со Делта сој, вели Псаки. Според неа, во моментов нема временски план за траењето на ограничувањата, но „ништо не е неограничено“.

USA Pressesprecherin des Weißen Hauses Jen Psaki
Псаки: Поради Делта варијантата ќе ги задржиме важечките ограничувања на патувањетоФотографија: Susan Walsh/AP Photo/picture alliance

САД ја затворија својата граница за граѓани на ЕУ, Велика Британија, Кина и Иран пред повеќе од една година. Подоцна списокот на земји се прошируваше, беа вклучени и Бразил и Индија. Исклучоци од забраната за влез се прават за новинари, студенти и бизнисмени.

Авионските линии и туристичките концерни вршат голем притисок за укинување на ограничувањата. И канцеларката Ангела Меркел на средината од месецов, при посетата на американскиот претседател Џо Бајден, се заложи за тоа. Координаторот на германската влада за трансатлантски прашања Петер Бејер неодамна аргументираше дека разлабавување на рестрикциите е важно и поради тоа што германските фирми обезбедуваат стотици илјади работни места во САД. Американците, според него, би морале да сфатат дека „ако веќе нема размена, тогаш се загрозени и американските работни места“.

ЕУ во јуни побара од земјите членки да почнат со постепено укинување на ограничувањата за патниците од САД и други држави. Германија потоа дозволи влез од САД „за сите цели на престој, вклучително и туризам“.