Русија ѝ контрира на ЕУ

Москва реагира на забраните за влез во ЕУ со забрана за влез во Русија. Меѓу лицата од ЕУ на кои им е забранет влез во Русија се претседателот на Европскиот парламент, Давид Сасоли, вицепретседателката на Европската комисија, Вера Јурова и берлинскиот обвинител Јерг Раупах, соопшти рускoто Министерство за надворешни работи.

ЕУ претходно донесе санкции поради руските постапки кон критичарот на Кремљ, Алексеј Навални. Унијата пред неколку недели донесе одлука за казнени меркипротив високи руски функционери. Русија ја критикуваше таа постапка и го обвини Брисел за антируска хистерија. Сите предлози од Москва за решавање на проблемите помеѓу Русија и ЕУ „консеквентно се игнорираат и отфрлаат“, се тврди од руска страна. Според официјална Москва, целта била „да се спречи развојот на Русија по секоја цена“.

Опозиционерот Навални на почетокот на февруари во Москва беше осуден на две и пол години казнен логор. Тој, како што се тврди, повеќепати ја прекршил условната казна од 2014 година. ЕУ смета дека казната е недозволива, меѓу другото и поради тоа што Навални по нападот со нервен отров новичок мораше да биде лекуван во Германија повеќе месеци. Поради нападот врз Навални извршен на 20 август 2020 година, ЕУ минатата година веќе донесе забрани за влез и замрзнување на имот на лица од опкружувањето на рускиот претседател Владимир Путин. Во Брисел се смета дека зад атентатот стојат државни функционери во Русија. Москва тоа постојано го отфрла и повторува дека нема да толерира мешање во руските внатрешни работи.