1. Прескокни до содржината
  2. Прескокни до главната навигација
  3. Кон други страници на DW

Преговорите за Брегзит почнуваат наредната недела

СН/ агенции
12 јуни 2017

Во наредната недела конечно треба да започнат преговорите за излегувањето на Велика Британија од ЕУ. Британскиот министер за Брегзит притоа има намера да се придржува до тврдиот курс.

https://p.dw.com/p/2eWYu
Großbritannien David Davis Verhandlungsführer Brexit
Фотографија: picture-alliance/Zumapress/R. Pinney

Официјалните преговори за британското напуштање на ЕУ не би можеле да започнат на 19 јуни, бидејќи тоа е истиот датум  на кој владата би требало да ја изложи својата политичка програма во новоизбраниот парламент, изјави денеска министерот за Брегзит, Дејвид Дејвис (насловна фотографија). Дејвис, чија Конзервативна партија би требало да ја изложи својата политичка програма на 19 јуни, истиот ден кога и кралицата ќе одржи говор во парламентот, изјави дека преговорите за Брегзит би можеле да започнат наредната недела. „Тоа ќе се случи во наредната недела, тоа се првите расправи“, изјави тој за „Скај њуз“, одговарајќи притоа и на прашањето за техничките детали на преговорите. „Мојот постојан секретар е таму, всушност денес е во Брисел за да разговара за деталите. Тоа нема да се случи до наредниот понеделник, бидејќи тогаш е говорот на кралицата и јас ќе морам да зборувам за тоа“, изјави Дејвис. Тој уште истакна дека има намера да остане на најавениот тврд курс во преговорите

London Demo gegen Brexit
Фотографија: picture-alliance/dpa/A. Rain

Дејвид Дејвис уште изјави оти европските граѓани не би требало да се грижат за своите идни права и изрази надеж дека договорот ќе се постигне брзо по започнувањето на преговорите за Бергзит. Дејвис рече оти ќе присуствува на деталните расправи за британското напуштање на ЕУ, додека премиерката Тереза Меј ќе има „големи преговори“ со останатите европски лидери.

„Во Британија има луѓе кои се грижат дека не можат да останат тука, има и Британци кои живеат во Шпанија и се грижат оти не можат да останат таму“, изјави Дејвис за ББЦ радио. „Грижите се непотребни, и тие не би требало да ги имаат бидејќи ние сакаме да започнеме со тоа што е можно поскоро“, рече тој. Дејвис, истотака, рече оти финансиските прашања и статусот на Северна Ирска ќе бидат на деневен ред на почетокот на разговорот за Брегзит.

 

Инаку британската премиерка, Тереза Меј, вчеравечер ги именуваше членови на кабинетот во малцинската влада, а меѓу клучните имиња се првиот државен секретар Дамјан Грин, министерот за финансии Филип Хамонд, министерот за надворешни работи Борис Џонсон, министерката за внатрешни работи Амбер Рад, министерот за Брегзит Дејвид Дејвис и министерот за одбрана Мајкл Фелон.

Großbritannien Theresa May Gottesdienst in Sonning
Фотографија: Reuters/N. Hall

Тереза Меј инсистира да остане на местото премиерка на Велика Британија, и покрај повиците да поднесе оставка по лошите изборни резултати на нејзината партија. Таа рече оти „кабинетот одразува богатство на талент и искуство“ од Конзервативната партија и додаде дека таа влада ќе биде „влада на сите“ во Велика Британија.

Конзервативците на Тереза Меј освоија 318 мандата и иако се најсилна партија во парламентот, немаат потребно мнозинство од 326 места. Лабуристите ги надминаа очекувањата и освоија 262 места во парламентот.