1. Прескокни до содржината
  2. Прескокни до главната навигација
  3. Кон други страници на DW

Усвоена Резолуцијата за преговорите со Бугарија

ДТЗ
29 јули 2021

Со Резолуцијата ќе се покаже и утврди во кои рамки смее да се разговара, а што е рушење на национални и државни интереси, вели Мицкоски.

https://p.dw.com/p/3yGXu
Nordmazedonien Parlament - Sitzung am 25.03.2021
Фотографија: Petr Stojanovski/DW

Македонското Собрание ја усвои Резолуцијата за утврдување на државните позиции во контекст на блокадите на европските интеграции, поднесена од пратеничката група на ВМРО-ДПМНЕ. За Резолуцијата гласаа 96 пратеник, 95 гласаа „за“, а еден беше воздржан. Претходно, пратениците го поддржаа амандманот поднесен од група пратеници во Резолуцијата да се внесе уставното име на државата - Република Северна Македонија.

„Македонскиот идентитет и јазик се неприкосновена реалност на нашиот народ. Тие се наше наследство од претходните генерации и аманет за идните генерации. Токму затоа со оваа Резолуција посакуваме да ставиме крај на постојано присутните тенденции на негирање на волјата на народот и на преговори без граници за теми и дилеми кои припаѓаат во вековите од далечното минато“, рече пратеникот на ВМРО-ДПМНЕ, Тимчо Муцунски. Тој смета дека со Резолуцијата на македонската дипломатија и се дава цврста алатка во раце, со која на меѓународната сцена одговорно ќе се грижа за целосна заштита на македонскиот идентитет, традициите, етнокултурна посебност, колективниот интегритет...

Bildkombo Flaggen | Mazedonien und Bulgarien
Фотографија: Uwe Scholz/teamwork/imago images

-повеќе на темата: СДСМ и ВМРО-ДПМНЕ ќе се обединат за јазикот и идентитетот

Координаторот на пратеничката група на СДСМ, Јован Митрески ги повтори црвените линии во преговорите со Бугарија. „За македонскиот идентитет, македонскиот јазик, за македонската посебност, немало, нема и никогаш нема да има преговори. Едноставно, не може да се преговара за тоа што е неспорен факт. Денес, за целиот свет ние сме Македонци, кои зборуваат македонски јазик“, рече Митрески.

Лидерот на ВМРО-ДПМНЕ, Христијан Мицкоски, го поздрави донесувањето на Резолуцијата во македонското Собрание со која јасно се оцртуваат национални и државни позиции во однос на македонскиот јазик, историја и идентитет.

„Ваквата Резолуција како акт на законодавниот највисок демократски дом не може и не смее да биде прекршен и ќе биде обврзен акт за оваа и секоја идна Влада, претседател на држава и секоја институција по однос на идентитетските теми и прашања“, вели Мицкоски.