Попај, среќен ти роденден!
Спанаќот е чудесна храна! Тетовираниот морнар Попај е ѕвезда на сцената на цртаните филмови. Сега полни 90 години, но нема загубено ништо од својата супер моќ. Попај останува херој на многу генерации.
Шармантниот јунак
Конзерва спанаќ е задолжителна - со помош на овој зеленчук Попај излегува на крај со секој предизвик. Првпат се појави во серијата „Thimble Theatre“ во 1929 година и оттогаш неговата популарност само се зголемуваше. Неговиот шарм, добродушност, како и маркантниот изглед со истетовирано сидро, капетанска капа, луле и мускулести раце ја одушевуваат публиката до денес.
Непланиран успех
Притоа, таткото на Попај, Елзи Крајслер Сегар, за морнарот всушност испланира само споредна улога. Илустраторот во 1919 година ја конципираше стрип-серијата „Thimble Theatre“, каде уште од почетокот се појавува Олива, подоцнежната девојка на Попај. Омилениот морнар, чие име може да се преведе нешто како „ококорени очи“, од 1929 година ги потисна другите главни фигури.
Сопатниците на Попај
Љубовната приказна помеѓу Олива и Попај почнува случајно, со случаен бакнеж во образ. Оттогаш морнарот е бескрајно вљубен во нејзе и се обидува да ѝ го привлече вниманието. Откако Попај стигна до филмското платно, следбениците на илустраторот Сегар повторно го воведуваат неговиот противник Дибек. Кај Сегар тој се појави само во една епизода.
Големи непријатели
И Дибек негува чувства кон Олива. Затоа Попај и неговиот, исто така мускулест, смртен непријател постојано се тепаат. Но, Попај секогаш успева да го победи Дибек, зашто телесната сила не секогаш е клучна за победа во еден судир. Дибек, за разлика од Попај, не важи за многу паметен, па ни тогаш кога се наоѓа во други улоги (на фотографијата во улогата на морнарот Синбад)
Филмот со реални актери беше неуспешен
Откако во 1940-те Попај за првпат се најде во кината како цртана фигура, а потоа од 1957 година стана и телевизиски јунак, следуваше и првиот филм со реални актери. Во 1980 година Попај го глумеше Робин Вилијамс, а во улогата на Олива се најде Шели Дувал. Тоа беше првата филмска улога на Вилијамс, но филмот доживеа неуспех. Тоа, меѓутоа, не ѝ попречи на кариерата на Вилијамс.
Селото на Попај на Малта
Во филмот со реални актери „Морнарот со цврст удар“ Попај се усидрува во крајбрежното местенце Свитхевен. Таму е во потрага по својот исчезнат татко и мора да преживее неколку авантури. За филмот не се интересираше речиси никој, но филмските кулиси на островот Малта станаа „Селото на Попај“ и до денес привлекуваат туристи од цел свет.
Омилениот костим
Како стрип-јунак или на филмското платно сеедно: Попај и супер силите кои му ги дава спанаќот маѓепсуваат многу генерации. Оттука, не е чудно што маркантниот изглед на Попај е поттик за костими за многу негови фанови. Така е дури и на телевизијата, како на оваа фотографија, каде актерите во една епизода од серијата „Полна куќа“ се појавуваат како Попај и Олива.
Вечно сеќавање
Попај не е овековечен само на филмското платно и во старите стрипови. Фигурата во меѓувреме има свое цврсто место во поп-културата. Американскиот уметник Џеф Кунс дури изработи и двометарска статуа на морнарот - се разбира со конзерва спанаќ в рака. Во 2014 година, на аукција во Њујорк, статуата отиде во сопственост на претприемачот Стив Винди за 28 милиони долари.
Среќен роденден!
За 75. роденден на Попај врвот на Емпајер Стејт Билдинг светеше спанаќ-зелено. За 90. роденден медиумската куќа „King Features“ продуцираше неколку куси видеа на кои Попај е прикажан значително подмладено. Сепак, силата која му ја дава спанаќот е останата иста - со или без старосни брчки.