Помошта бавно стигнува до преживеаните

Катастрофалниот земјотрес што го погоди Хаити предизивка огромна меѓународна акција за помош. Но, спасувачките екипи, поради логистички проблеми, со големи напори пристигнуваат до погодените области, а шансите за преживување на жртвите се намалуваат од час во час. Хуманитарните работници кои веќе пристигнаа во главниот град на карипската држава наидоа на хаос, смрт и опустошеност. Меѓу мртвите тела и руините илјадници луѓе талкаат, повредени, гладни и трауматизирани. Војниците на ОН во меѓувреме се конфронтирани со растечкото нетрпение на преживеаните, кои се лути поради бавниот доток на хуманитарната помош.

Во меѓувреме почна и евакуацијата на некои од преживеаните. Покриен со волнено ќебе еден човек, кој претпладнево пристигна во Париз раскажува за ситуацијата околу аеродромот: „Сите беа трауматизирани, сите трчаа некаде и до моменот додека не одлетав, сите спиеја надвор. Тие не влегуваа во своите куќи, бидејќи тоа би било преголем ризик.“

Три денови по катастрофалниот земјотрес на Хаити, Франција предлага да бидат целосно избришани и долговите кои Хаити ги има во т.н. Париски клуб. Министерката за финансии Кристин Лагар веќе избирша четири од вкупно 44 милиони евра кои Хаити и‘ ги должи на Франција и ги повика Венецуела и Тајван, кои не се членови на клубот, да учествуваат во бришењето на долговите.

Франција и САД исто така се заложија и за организирање меѓународна конференција за обнова на Хаити. Во телефонскиот разговор претседателите Обама и Саркози се согласиле дека помошта за карипската држава ќе мора да биде координирана подолг временски период. Шпанското претседателство на ЕУ за в понеделник планира вонредна средба на европските министри за развојна помош.

Автор: Јоханес Духо/дв/афп/Александра Трајковска

Редактор: Елизабета Милошевска Фиданоска