Пет љубовни обичаи од Европа за кои веројатно не сте чуле
Рози, чоколада, накит - и годинава подароците за Св. Валентин се класични. Притоа, во Европа има многу други традиции со кои може да се „помогне“ расцутувањето на љубовта.
Пишување писма за Јулија
Балконот на Јулија е исто како и Денот на вљубените итар маркетиншки трик. Јулија и Ромео се ликови од фантазијата на Шекспир, а балконот во Верона постои од почетокот на 20.век. Сепак, секоја година илјадници луѓе одат во посета на наводната куќа на Јулија. Тука оставаат илјадници писма и желби во надеж дека ќе ја најдат својата среќа во љубовта.
Мајско дрво
Младите неоженети мажи во Германија во ноќта кон 1. мај на своите сакани пред вратите им оставаат дрва. И тоа не какви било дрва, туку млади брези накитени со шарени хартиени ленти, а понекогаш и со срца на кои е испишано името на саканата. Дрвото се остава да стои еден месец. Доколку чувствата се обострани, на крајот на обожавателот му се даваат слатки, пиво, а можеби дури и бакнеж.
Делкање љубовна лажица
За саканата е знак на љубов, за нејзините родители е доказ дека идниот избраник е занаетчиски надарен. Традицијата на т.н. „љубовни лажици“ во Велс датира од 17. век. Темните зимски ноќи или долгите патувања со брод давале доволно време за делкање и резбање. Денес лажиците се омилен сувенир.
Берење цвеќе
На средината од летото во Шведска се подарува цвеќе, но не на саканата личност, туку себеси! Седум различни видови цвеќе од седум различни ливади, самостојно набрани, се ставаат под перница во верување дека даваат магична сила. Според шведското суеверие, на младите девојки во сонот им се појавува човекот за кого ќе се омажат.
Танцување со јаболко
При овој, мора да се признае малку излезен од мода, австриски обичај, во игра е носот. Жената танцува со парче јаболко под пазувите, кое потоа му го дава на саканиот да го јаде. Вистински доказ за љубов, кој има смисла од биолошки аспект - преку феромоните во потта двојките брзо сфаќаат дали „се мирисаат“ или не.