Папандреу бара поддршка од опозицијата

На отворањето на парламентарната дебата денеска во грчкиот парламент Папандреу побара на неговиот реконстриран кабинет во вторник да му биде изгласана доверба. За тоа се потребни 151 глас од вкупно 300 пратеници. Социјалистичката партија Пасок на Папандреу располага со тесно мнозинство од 155 пратеници, но и дел од нив критички гледаат на пакетот мерки за штедење.

Антонис Самарас, лидерот на конзервативната опозициска партија, веднаш по говорот на Папандреу се изјасни дека неговата Нова демократија нема да гласа за доверба на владата. Премиерот води политика која не води кон решавање на проблемите, туку само ги заострува, тврди Самарас. Двете леви опозициски партии се против економските владини мерки. Новиот пакет мерки за штедење предвидува заштеда од вкупно 28 милијарди евра до 2015 година, од кои уште годинава треба да бидат заштедени 6,4 милијарди евра. Согласноста на парламентот за мерките е предуслов на почетокот на јули Грција да ја добие петтата транша од вкупно 110 милијарди евра итни кредити од ММФ и ЕУ.

Половина од Грците се против штедењето

Инаку, речиси половина од Грците се против мерките за штедење што ги предложи грчката влада, покажуваат резултатите од анкетата на агенцијата „Капа Рисрч“ . Според анкетата, 47,5 проценти од Грците се против владините мерки за штедење и сакаат предвремени избори, додека 34,8 отсто го поддржуваат усвојувањето на рестриктивниот пакет. Истражувањето, спроведено на 14 и 15 јуни со 1.208 испитаници, пред петочната реконструкција на владата, покажува и дека мнозинството Грци сакаат предвремени избори и смена на грчкиот премиер Јоргос Папандреу. Речиси 90 проценти од анкетираните сметаат дека Грција се движи во погрешна насока, а околу 80 отсто се противат на истапувањето на земјата од еврозоната.

Референдум за измена на политичкиот систем

Грчкиот премиер Јоргос Папандреу денеска најави и дека во текот на есента неговата влада планира да организира референдум за промени во политичкиот систем во Грција, вклучително и измени на грчкиот устав.

Папандреу нагласи дека е потребна реформа на државниот сектор чија сегашна поставеност „ја турна Грција на колена“, поради што најави спроведување на „сериозни промени“.

Според Папандреу, со реформите ќе бидат опфатени и измени на Уставот на земјата, со цел да се овозможи поедноставување на процедурата за судско гонење на владините претставници.

За должничката криза во Грција денеска во Луксембург ќе започнат советување министри за финансии од земјите од ЕУ, пред се‘ за пакетот од дополнителни 120 милијарди евра економска помош. Преговорите за него треба да завршат до средината на јули, иако во Брисел има и гласови кои бараат работата да се забрза.

Автор: ЖА/ТТ/дпа/афп/миа

Редактор: Трајче Тосев