Новите 7 светски чуда

Новите 7 Светски чуда беше онлајн анкета за популарност која започна во 2000 година. Милиони луѓе гласаа избирајќи од листа со 21 споменик. Конечно, во 2007, неофицијалната листа на седум чуда беше објавена. Таџ Махал во Агра, Индија се најде на листата. Сметан за архитектонско ремек-дело, мавзолејот од 17 век привлекува речиси 8 милиони туристи годишно.

Познат и под името Розов град, Петра е испреплетена со гробови и храмови исклесани во розови песочни карпи. УНЕСКО го опишува како „еден од највредните културни споменици на човештвото“. Случајно, Швајцарецот Бернард Вебер се инспирираше да го започне Новите 7 Светски чуда откако талибанците уништија две статуи на Буда кои беа слично изработени во 2001 година.

Познат кај Кинезите како „Долгиот Ѕид“, структурата направена од цемент, карпи, тули и земја имала за цел да го заштити северот на кинеската империја од непријателите. Со должина од 21,196 километри тоа е најдолгата структура воопшто изградена од човекот. Спротивно на популарното мислење, не може да се види со голо око од вселената.

Лоциран на полуостровот Јукатан во Мексико, Чичен Ица е познат по добро сочуваната голема пирамида во својот центар. Објектот претставувал религиозно-политичко свртувалиште во империјата на Маите, што ја објаснува фузијата на различни архитектонски стилови од различни региони. Сепак, ретко е вака празен како што се гледа на фотографијата затоа што милиони туристи доаѓаат во посета секоја година.

Иако Мачу Пикчу е извор на туристички приходи за Перу, илјадниците туристи му предизвикуваат огромна штета на античкиот град на Инките. Додека локалните политичари сакаат да го подобрат пристапот на туристите преку жичарници и лифтови, УНЕСКО бара построги правила и помалку посетители. Експанзијата на инфраструктурата околу Мачу Пикчу предизвикува и лизгање на земјиштето во околината.

Колосеумот е единствената европска структура која се најде на листата на новите Седум Светски чуда. Тоа било местото на гладијаторските борби во Рим, а се смета дека во него се реконструирале и поморски битки. Денес, амфитеатарот е една од главните туристички атракции во Рим.

Со височина од 30 метри и тежина од 1,145 тони, со распон на рацете од 28 метри, монументалниот споменик чува стража над Рио де Жанеиро на ридот Корковадо. Статуата, завршена во 1931 година, успеа да се најде на листата на светските чуда благодарение и на тоа што бразилската држава активно го поддржуваше гласањето.

Замокот Нојшванштајн за малку не се најде меѓу Новите 7 Светски чуда. Изграден од баварскиот крал Лудвиг II во 1869, замокот кој се наоѓа во Алгој се најде на осмото место. Иницијативата „Чудата на светот за Германија“, ги обвини Германците дека не го поддржале проектот. Во најголем дел за замокот гласале Јапонци и Корејци.

Пирамидите во Гиза се единственото светско чудо од антиката кое сѐ уште може да се види. Грчките историчари беа тие што ја започнаа праксата на запишување на чудата, и кои први ги запознаа структурите во Египет, Персија и Бабилон. Сепак, Седумте светски чуда на стариот свет биле дефинирани многу подоцна.