Најубавите национални паркови во Германија
Уникатни пејзажи, заштитени видови животни и растенија - германските национални паркови, од Алпите во Баварија до плиткиот појас на брегот на Северно Море се вистински празник за очите.
Национален парк Баварска шума
Најстариот национален парк во Германија настанал во 1970 година. Бескрајни борови шуми со диви планински поточиња и блата преовладуваат во планинскиот масив во југоисточна Германија. Посетителите можат да уживаат во убавините движејќи се по 300 километри патеки и 200 километри патеки за велосипеди.
Национален парк Јазмунд
Островот Риген во Балтичко Море е познат по стрмниот брег. Веројатно најпознатиот германски сликар од епохата на романтизмот, Каспар Давид Фридрих, со своето дело „Варовничките карпи на Риген“ му подигнал уметнички споменик. Заедно со стотици години старите букови шуми на островот, белите карпи се препознатлив знак на Националниот парк Јазмунд.
Национален парк Хајних
„Прашума среде Германија“ - така се нарекува Националниот парк Хајних во покраината Тирингија. Во неговите букови шуми посетителите можат да сретнат диви мачки или да уживаат во прошетките под крошните на старите дрвја.
Национален парк Мириц
Националниот парк Мириц е дел од езерската област во покраината Мекленбург Предна Померанија. Тука се наоѓаат речиси недопрени мочурливи шуми, а на преку 100 езера се одомаќиниле ретки водиви птици, како орел-рибар и езерски орел. Многу од езерата можат да се видат со пловење на брод или кану.
Национален парк Харц
Околу Харц и неговата највисока планина, Брокен, се плетат бројни легенди и митови. Често над долината се надвива густа магла и ги прекрива шумите на планинскиот масив во таинствена светлина. Со малку среќа, посетителите можат да наидат на траги од рисови и диви мачки и да ги набљудуваат дивите елени.
Национален парк Преднопомерански лагуни
Се нарекуваат „лагуните на Балтичко Море“, а тоа се плитки, преку острови или полуострови одделени заливи на морето во покраината Мекленбург Предна Померанија. Водите и солените ливади на Националниот парк Преднопомерански лагуни се важно место за престој и одмор за птиците-преселници. Во есен овде на пример долетуваат десетици илјади жерави на пат кон југ.
Национален парк Саксонска Швајцарија
Карпестите масиви на Националниот парк Саксонска Швајцарија веќе 150 години се омилена цел на планинарите. Некои од планинските врвови се достапни и за шетачите преку скали за искачување. Одозгора се отвора панорамска глетка врз природата со нејзините карпести предели, клисури и шуми.
Национален парк Берхтесгаден
Ова е единствениот германски национален парк во Алпите. Националниот парк Берхтесгаден во југоисточна Баварија е карактеристичен по стрмните карпи, но и зелените ливади и бистрите планински езера. Тука живеат мрморци, диви кози и т.н. кралски орли.
Национален парк Шварцвалд
Германскиот најмлад национален парк се наоѓа во југозападниот дел од земјата. Во густината на неговите елкови, букови и борови шуми живеат ретки видови птици како еден вид фазан, а неговите мочуришта пружаат животен простор за отровната змија шарка.
Национален парк Шлезвиг-Холштајн Ватенмер
Националниот парк Шлезвиг-Холштајн Ватенмер е најстар и најголем од трите германски Ватенмер-национални паркови. Силната плима и осека дава печат на овие три национални паркови на Северно Море. При осека водата се повлекува и за кратко време остава слободни широки површини на морскиот брег. На крајбрежјето живеат неколку видови фоки.