Најскапиот проблем на Србија

Диви депонии долж реките, корита полни со различен отпад, гранки, недвоење на сметот и разни други проблеми предизвикани од човечка рака. Сето тоа е голем залак за Србија во процесот на пристапување кон ЕУ. Поглавјето 27, посветено на екологијата, ќе биде најтешко, не само поради потребните пари туку и поради потребата од промена на свеста во односот кон природата.

„Поглавјето 27 има 10 подобласти и на секоја треба да ѝ се посвети внимание“, вели за ДВ еколошката активистка Драгана Вукадиновиќ. Според неа, отпадните води се најголем проблем, додека во ЕУ тие се пречистуваат во 90 % пред да се испуштат во природа, во Србија се прочистуваат само 10 %. Тие води, некогаш хемиски неисправни, често се и топли, па страда цел растителен и животински свет во водите.

Решението е употреба на скапи филтри, посебно од страна на фабриките, што проблемот го прави моментно нерешлив, зашто законите за тоа не се ни донесени. А освен фабриките, големи штети на реките и езерата им предизвикуваат и поединци. Еден литар моторно масло или масло за јадење уништува 10.000 литри чиста вода.

Еден од поголемите еколошки проблеми на Србија е и сечењето на буките и дабовите дрвја за огрев. Многу домаќинства се греат токму на овој начин, зашто е поевтино, а тоа дополнително ја уништува животната средина.

Екологистката Драгана Вукадиновиќ вели дека во последно време во Србија се појавија фабрики за правење палети како енергенс за греење. Наизлед тоа е пофално, но поради тоа што не е лесно собирањето на ситниот дрвен отпад за правење палети, сопствениците почнале за таа цел да сечат и шуми.

Сечата на „белите дробови на планетата“ е главен виновник за намалување на кислородот и зголемување на јаглеродниот диоксид и директно влијае врз климатските промени. Сечењето шуми директно доведува и до ерозии на тлото што во Србија е присутно речиси насекаде, тоа е и причина за одрони кои често загрозуваат и луѓе.

Сепак, смета екологистката, „нема да има полесни и потешки работи во имплементацијата на поглавјето 27 - сѐ ќе биде тешко.“ Унапредувањето на јавното здравје е една од областите на поглавјето, а Србија тешко ќе го направи овој чекор ако и натаму дозволи создавање диви депонии, кои ги има и во урбаните средини и во природата.

Вукадиновиќ истакнува: термоелектраните „Костолац“ и „Никола Тесла“ во Обреновац официјално се најголеми загадувачи на Балкан, користат лигнит од трет степен на квалитет со катастрофални последици по климатските промени и појава на „кисели дождови“.