Крвав карневал во германскиот Фолкмарзен

Најмалку 30 лица се повредени, а возачот е уапсен, но полицијата се уште нема детали за мотивацијата на лицето кое со автомобил влета во публиката за време на карневалската прослава.

„Има десетици повредени, меѓу нив некои посериозно и за жал исто така и деца“, изјави портпаролот на полицијата Хенинг Хин. Дел од повредените се во критична состојба.

Германската полиција верува дека возачот со намера влетал во толпата луѓе, но засега нема индиции за политички мотивиран акт.

Во Германија денеска во голем број градови се слави Карневалот, а најголемите паради се одржуваат во Келн, Диселдорф и Мајнц. Фолкмарзен, со население од седум илјади жители, се наоѓа источно од Диселдорф.

Сведоците велат дека возачот ги заобиколил полициските блокади поставени за да ги одвојат учесниците на карневалот и гледачите. На видео снимките од местото на настанот може да се види сребрено возило Мерцедес на тротоарот.

Полицијата во покраината Хесен соопшти дека се стопирани сите останати карневалски поворки како мерка на претпазливост.