Ким Јонг Ун се појави во јавност
2 мај 2020
Ким Јонг Ун исчезна од јавноста пред околу три недели. Сега севернокорејскиот властодржец, според ифнромациите на државните медиуми во земјата, повторно се покажал во јавност. Тој вчера учествувал на свеченост по повод отворањето на една фабрика за ѓубрива, северно од Пјонгјанг.
Весникот „Родонг Синмун“ објави фотографии од Ким, на кои е прикажано како тој во темен Мао-костум сече црвена лента, или со насмевка се шета обиколен од функционери.
Повеќе:
Загатката во врска со Ким Јонг Ун нема расплет
Ким Јонг Ун е во критична здравствена состојба?
Американскиот претседател Доналд Трамп на молбата да го искоментира појавувањето на Ким, рече: „Се’ уште не би го коментирал тоа.“ Трамп додаде дека ќе има изјава кога ќе биде време за тоа.
Настапот на Ким, според набљудувачите, би можел привремено да им стави крај на шпекулациите околу неговата здравствена состојба. Медиумите контролирани од страна на државата 20 дена не известуваа за јавни активности на властодржецот. Шпекулациите дека Ким е сериозно болен се зацврстија особено откако тој не се појави на свеченостите по повод роденденот на својот дедо и поранешен лидер на Северна Кореја, Ким Ил Сунг, на 15 април во Пјонгјанг.
Сега севернокорејските медиуми не наведуваат причина за исчезнувањето на Ким.