Анкета на НДИ: Растат песимизмот и недовербата кон партиите
2 јули 2020
Засилен песимизам кај македонските граѓани во последните три месеци од почетокот на пандемијата на коронавирусот, утврдува анкета на Националниот демократски институт (НДИ). Во последното истражување на јавното мислење, 44% од испитаниците оцениле дека државата се движи во погрешна насока-зголемување за 11% во однос на март.
Граѓаните се најзагрижени за економските проблеми и вработувањето, како и за системските проблеми- за овие проблеми се изјасниле повеќе од една третина од испитаниците- но на трето место сега е и пандемијата на Ковид-19 од која стравуваат над 20 проценти. Во однос на периодот февруари/март кога е правена претходната анкета на НДИ, во јуни дури 38 отсто од испитаниците велат животот им е влошен, во однос на 24 проценти пред три месеци. Најголема доверба (40%) испитаниците имаат во претседателот на државата, а најголема недоверба (68%) во судовите.
Кај политичките партии, трендот покажува пад на довербата кој е најизразен во однос на владејачката СДСМ. Најголемиот дел од испитаниците и понатаму со најголема благонаклоност гледаат кон Социјалдемократите (39%), но се зголемило и разочарувањрето од владејачката партија, па сега 56% од испитаниците гледаат неблагонаклонето кон неа. Благонаклоност кон опозициската ВМРО-ДПМНЕ имаат 29% од испитаниците, а 67% неблагонаклонето. Партиските бројки речиси се пресликуваат и во благонаклонетоста кон лидерите на двете партии Зоран Заев и Христијан Мицкоски.
Веројатноста граѓаните да гласаат на претстојните вонредни парламентарни избори се намалила за 7% вкупно, и дури 15% кај етничките Албанци.
Помалку од 25% од испитаниците во јуни рекле дека на изборите ќе гласаат за коалицијата на СДСМ и Беса, нешто над 21% гласот ќе го дадат за ВМРО-ДПМНЕ; 7,2% за ДУИ; 5,7 за Алијанса на Албанците, а 16% најавиле дека нема да гласаат. Најголемиот дел (22%) од оние кои нема да гласаат рекле дека причината е стравот од коронавирусот, а 15% ќе бојкотираат. Останатите се разочарани или незаинтересирани.
Маргината на грешка во анкетата, според НДИ, е 2,8% односно за толку, во плус или минус, можат да се разликуваат резултатите.