Иран прекина испорака на нафта за Франција и Велика Британија
19 февруари 2012
„Испораката на нафта кон Велика Британија и Франција е стопирана, наместо нив, ние имаме нови потрошувачи“, вака е цитиран портпаролот на ирачкото министерство за нафта во Техеран на официјалната интернет страница. Натамошни детали притоа не се соопштуваат.
Техеран во последно време зачестено се закануваше со запирање на испораката на нафта за европските земји кои учествуваат во санкциите против Иран поради неговата спорна атомска програма.
Министрите за надворешни работи и лидерите на 27-те земји членки на
Европската унија на состанокот од 23-ти јануари во Брисел го одобрија ембаргото за снабдување со нафта од Иран. Како дел од овој пакет санкции, кој се претпоставува дека ќе почне да функционира од 1-ви јули, сите членки на ЕУ ќе треба да го запрат целосно увозот на нафта од Иран.
Најголемиот дел од европските увозот на иранската нафта, околу 68 отсто
отпаѓа на Грција, Италија и Шпанија. Во Грција, уделот на потрошувачката на
„црното злато“ од Иран изнесува 35 отсто.
Инаку, и иранскиот парламент планира донесување закон со кој ќе се забрани извозот на нафта во европските земји кои воведоа санкции против Техеран. Советувањата на оваа тема меѓутоа беа одложени за во март.
Западот го обвинува Иран дека под плаштот на цивилно користење на нуклеарната енергија, тајно работи на создавање атомска бомба, што Техеран го негира.
Автор: ЖА/СН/дпа/дв
Редактор: Симе Недевски