Железничка несреќа во Монтана – неколку жртви
26 септември 2021Несреќата се случила во близина на местото Џоплин, околу 48 километри оддалечено од границата со Канада, во северниот дел од сојузната американска држава Монтана. Според информации од железничката компанија „Амтрак“, во возот се наоѓале 146 патници и 16 членови на персоналот.
Американските медиуми, повикувајќи се на изјава на шерифот од Либерти Кантри, известуваат за најмалку тројца загинати, а подоцна и „Амтрак“ ја потврди бројката. „Њујорк тајмс“ објави дека според локалните власти, повредени се околу 50 лица. Возот кој тргнал од Чикаго, Илиноис, се наоѓал на пат кон Сиетл во американската сојузна држава Вашингтон. Делницата е долга околу 3400 километри. Компанијата „Амтрак“ соопшти дека возот имал две локомотиви и десет вагони, од кои седум излетале од шините.