Европа во бел фустан
Снегот на многу места во Европа во изминатите недели предизвика хаос. Но, белата покривка носи и радост и предизвикува восхит со начинот на кој ја разубавува природата.
Магична тишина
Снегот на шумите им дава извесна волшебност. Снежниот товар овде, во Хоес Фен, во граничниот регион помеѓу Белгија и Германија, ги турка надолу не само гранките, туку создава и вид на тишина која е присутна само во шумите под снежна покривка.
Свет на сиви нијанси
Кога снегот се простира до каде што допира погледот, се' изгледа како да потонало во црно-бели нијанси. Единствено небото потсетува на тоа дека светот има повеќе од две бои.
„Снежни топчиња“
Дамки во други бои има и назима. Овие бобинки (arrowwood berries) отсјајуваат под снежните капи. Плодовите се важен извор на храна за птиците кои не заминуваат на југ. Раснат во цела централна и источна Европа.
Лозја како графики
Напролет вакво нешто може да значи штети за жетвата. Но во јануари снегот не им може ништо на лозите во Ајзентал. Напротив, растенијата имаат потреба од зимски мир за да можат засилено да влезат во вегетацискиот циклус. Снегот повеќе им пречи на лозарите, кои во ова време ги зарежуваат лозите.
Зимска романтика во дивина
Погледот врз замокот со снег остава простор за претпоставки како луѓето порано се справувале со зимата и студот и колку биле среќни ако имале топол камин. Историјата на замокот Крибштајн во Саксонија е долга повеќе од шест века. Замокот е автентично витешки и тоа го прави погледот на него дотолку поромантичен.
Капење во снег и мраз
Капењето во снег и мраз има традиција пред се' во источна Европа. Овие бестрашни луѓе на исклучително голем студ се подготвуваат за капење во езеро во околината на полскиот град Краков.
Санкање во Истанбул
Во првата недела од јануари 2021-ва снег падна и на места кои и не се познати многу по мразови и снегови. Истанбул е едно од тие места. Метрополата на Босфор последен пат имаше снежна покривка пред две години. Затоа, малку забава на снегот не смее да се пропушти. Кој нема санка при рака, може да се санка и со пластична кеса.
Сноуборд во Мадрид
И Шпанија најчесто асоцира на лето, сонце и песок. Но, во Мадрид, кој се наоѓа на 670 метри надморска височина, благи наноси од снег не се реткост назима. Сепак, количеството снег кое падна во Мадрид зимава во никој случај не е нешто вообичаено. А, тоа, овој скијач на штица не сакаше да го пропушти.