Десетици жртви по ерупцијата на вулканот Фуего

Во ерупцијата на „Огнениот вулкан“ во Гватемала животот го загубија најмалку 65 луѓе, а повредени се околу 300, соопшти гватемалската Служба за цивилна заштита. Директорот на Институтот за форензика, Фануел Гарсија, изјави дека е почната идентификацијата на жртвите. Спасувачките екипи, според тврдењето на властите, работат без пауза за да им помогнат на погодените од катастрофата. Се смета дека бројот на жртвите ќе се зголемува и натаму. Голем број луѓе сѐ уште се водат како исчезнати.

Вулканот Фуего, кој се наоѓа на само неколку десетци километри од главниот град Гватемала, еруптираше во неделата и целосно уништи најмалку едно село. Лавата „голтна“ голем број куќи. Над три илјади луѓе од регионот се евакуирани. Претседателот Џими Моралес прогласи вонредна состојба за помошта да може да стигне што е можно побрзо до регионот погоден од катастрофата. Тој прогласи тридневна жалост и го повика населението да остане мирно. „Стотици полицајци, членови на Црвениот крст и војници се во акција“, рече Моралес.

Ерупцијата на вулканот траеше 16 часа. Вчера Фуего повторно беше активен, но со помал интензитет. Фуего е еден од трите најактивни вулкани во Гватемала.