Гуаидо: Протерувањето на германскиот амбасадор е „закана“

Николас Мадуро сака да покаже дека сѐ уште има власт во свои раце, па затоа протерува амбасадори, но тој не е овластен за тоа, изјави самопрогласениот венецуелски амбасадор Хуан Гуаидо за „Шпигел“ и додаде дека тој го замолил германскиот амбасадор да остане во Венецуела. „Јас го признавам и сакам да ѝ се заблагодарам на Германија за пружената хуманитарна помош“, рече Гуаидо.

Владата во Каракас вчера соопшти дека германскиот амбасадор Даниел Кринер мора да ја напушти Венецуела во рок од 48 часа. Поради тоа што се меша во внатрешните работи на земјата, Кринер е прогласен за непожелна личност, се вели во образложението на одлуката на владата.

Повеќе: Венецуела: Кој ќе издржи во политичкиот покер?

Германскиот министер за надворешни работи Хајко Мас изјави дека „несфатливата одлука“ натамошно ја заострила ситуацијата. Тој одлучил да го повика амбасадорот на консултации, но европската поддршка за Гуаидо е нескршлива.

Кринер беше еден од четворицата странски амбасадори кои во понеделникот го зедоа Гуаидо од аеродромот во Каракас, за да се исклучи евентуално апсење при неговото враќање во земјата. Хуан Гуаидо ја напушти Венецуела и покрај забраната за излегување од земјата со цел да се сретне со шефовите на влади на соседните земји.

Уапсениот американски новинар протеран во САД

Во меѓувреме, американскиот новинар Коди Ведл, кој вчера беше уапсен во Венецуела, е протеран во САД, јави венецуелскиот новинарски синдикат СНТП. Околу 12 часа по апсењето, репортерот е однесен на меѓународниот аеродром во Каракас, од каде требало да биде качен во авион за САД. Ведл известуваше за политичката криза во Венецуела за различни американски медиуми.

Новинарот и неговиот венецуелски соработник Карлос Камачо беа упасени вчера изутрина од страна на агенти на венецуелската воена тајна служба. Агентите направиле претрес на станот на репортерот и заплениле средства за работа, јави новинарскиот синдикат СНТП. Причините за апсењето не се соопштени.

Повеќе: Какви се шансите за американски воен напад во Венецуела?

Американското министерство за надворешни работи изрази загриженост поради апсењето и побара итно ослободување на Ведл. „Да се биде новинар не е злосторство“, напиша на Твитер портпаролката на министерството Кимберли Брејер. Таа за случајот го обвини претседателот Мадуро.