Германија: Огнена стихија по ракетен тест
22 септември 2018
Министерката за одбрана на Германија Урсула фон дер Лајен (ЦДУ) денеска престојува во Емсланд. Таа во воениот полигон на Бундесверот во близина на Мепен стекнува слика за катастрофалниот пожар и за ситуацијата на теренот. На програмата се и разговори со противпожарната бригада, која со околу 1000 мажи и жени учествува во операцијата за гаснење на пожарот во мочуришната област кој гори веќе цели две недели.
Фон дер Лајен треба да ги посети и околните места каде вчера беше прогласена вонредна состојба и каде што најмалку 1000 луѓе се подготвени за евентуална евакуација.
Пожарот избувна на полигонот за вежби на Бундесверот во близина Мепен откако од хеликоптер беа испукани ракети. Според информациите на Бундесверот, во меѓувреме, пожарот зафатил површина од 800 хектари во околната мочуришна област. Портпаролот на министерството за одбрана Јенс Флосдорф изјави дека ситуацијата е многу сериозна и се извини за евентуалните грешки. Чадот од пожарот во меѓувреме се прошири во радиус од 100 километри и може да се види од сателит.