Генерален штрајк ја парализира Грција, судири во Атина
19 октомври 2011
Во Грција денеска се штрајкува во државните претпријатија, банките, министерствата, болниците, училиштата и сообраќајот. Затворени се и продавници и пекарници. На штрајкот, на определено време, му се придружија и контролорите на летање.
Во голем број градови десетици илјади луѓе излегоа на демонстрации, а пред парламентот во Атина дојде до жестоки судири меѓу полицијата и демонстрантите.
Венизелос бара поддршка
Со генералниот штрајк синдикатите сакаат да ја натераат владата на поумерен курс на штедење. Се очекува парламентот утре да гласа за нацрт-законот, кој предвидува зголемување на даноците, намалување на платите и отпуштања во државниот сектор.
Грчкиот министер за финансии Евангелос Венизелос денеска повика на поддршка во текот на подготовката на пратенциите да го гласаат новиот владин пакет за штедење:
„Водиме мачна, но неопходна борба за да ја избегнеме последната и најтешка етапа од кризата“, изјави Венизелос пред грчките пратеници пред утрешното гласање.
Министерот изрази надеж за значајно и конечно решение на кризата пред средбата на врвот на ЕУ, закажана за во недела.
„ Луѓето треба да покажат разбирање за борбата на владата да го избегне најлошото“, истакна Венизалос.
Автор:ЕМФ/СН/дв/афп/миа
Редактор: Симе Недевски