Венецуела чекори кон диктатура

Наспроти протестите и безредијата со голем број жртви, венецуелскиот претседател Николас Мадуро оцени дека гласањето за Уставното собрание во земјата било успешно. „Имаме Уставно собрание“, рече шефот на државата во Каракас пред стотици приврзаници. Според Мадуро, ова е „најголемо гласање за револуцијата“.

Шефицата на Националната изборна комисија, Тибисај Лусена, соопшти дека својот глас го дале повеќе од осум милиони луѓе, или 41,5% од вкупниот број избирачи. За место во Уставното собрание се пријавија околу 50.000 луѓе, а дозвола за кандидатура, согласно правилата на Мадуро, добија 6100 лица.

Опозицијата во Венецуела тврди дека бројките за излезноста на гласачите не се вистинити и прикажани се како превисоки. Претходно опозицијата повика на бојкот на гласањето. Таа со недели протестира против изборот на Уставно собрание, но протестите и двата генерални штрајкане го предомислија претседателот Мадуро. Противниците на владата го обвинуваат Мадури дека со нов Устав сака да си обезбеди „диктакторски овластувања“.

Гласањето во Венецуела беше проследено со жестоки безредија. Најмалку осум луѓе загинаа во саботата вечерта, соопштија властите. Опозицијата тврди дека има најмалку 15 загинати.

САД соопштија дека нема да ги признаат резултатите од гласањето за Уставното собрание. Американската амбасадорка во ОН, Ники Хејли, изјави дека Венецуела прави „чекор кон диктатура“. Можно е веќе во текот на денов САД да воведат нови санкции против Венецуела, јави Ројтерс повикувајќи се на извори во владата во Вашингтон.

И Колумбија, Панама и Перу, како и повеќе меѓународни организации соопштија дека не ги признаваат резултатите од гласањето.