Ахмадинеџад: Иран нема да смени ништо во атомската програма

Земјата нема да скршне ни малку од патот, изјави иранскиот претседател Махмуд Ахмадинеџад во говор што денеска (09.11) го пренесоа државните ирански медиуми. Меѓународната агенција за атомска енергија го извалка своето достоинство, со тоа што презеде „непотврдени тврдења на Америка“, изјави иранскиот претседател.

Според сознанија на Меѓународната агенција за атомска енергија, Иран најмалку до минатата година во рамките на неговата атомска програма изведувал работи кои би можеле да служат во развој на нуклеарно оружје. Во извештајот кој им е доставен на владите на 150 земји-членки на МААЕ, се вели дека агенцијата на располагање има голем број веродостојни информации дека Иран до 2010 години спровел повеќе проекти за развој на атомска боева глава. Никогаш претходно агенцијата толку јасно не говорела за постоење програма за развој на атомско оружје во Иран. Исто така и опсегот и прецизноста на деталите се невообичаени. Постојано составувачите на извештајот истакнуваат дека нивните сознанија ги црпеле од бројни независни извори.

Со нетрпение очекуван извештај

Според нив, Иран во изминатите години бил наголемо активен во разработувањето на најважните делови за производство на атомско оружје. Кон тоа се вбројуваат, покрај досега познатото облагородување на ураниум, и контрукцијата на атомска боева глава, која иранските ракети би можеле да ја транспортираат, како и комплицираното развивање на механизмот за потпалување, кој може да предизвика нуклеарна верижна реакција.

Извештајот на МААЕ овојпат беше со нетрпение очекуван, пред се' поради тоа што Израел претходно јасно стави до знаење дека доколку е неопходно, ќе го спречи натамошното развивање на нуклеарната програма на Иран со воени средства. Израелската влада веќе долго време смета дека Иран има постигнато голем напредок во процесот на создавање атомско оружје. Владата во Техеран досега наспроти тоа постојано укажуваше дека атомската програма на земјата наводно служи исклучиво во мирољубиви цели.

Тајни проекти на Иран и покрај членството во МААЕ

Пред повеќе од 40 години Иран го потпиша договорот за неширење на атомското оружје и со тоа режимот во Техеран се приклучи кон МААЕ. Соработката меѓу Иран и агенцијата, меѓутоа, веќе подолго време е многу проблематична, зашто Иран повеќе од две децении изведува тајни проекти и го признава само она што може да се докаже.

Францускиот министер за надворешни работи, Ален Жипе, денеска побара со атомскиот спор да се занимава Советот за безбедност на ОН. Доколку Иран не ги исполни барањата на меѓународната заедница и одбива соработка, постои подготвеност за „санкции во обем што досега не е виден“, изјави тој за радиото РФИ. Во кинескиот партиски весник „Ренмин Рибао“ се предупредува на опасност од воен конфликт.

Автор: Јерг Пас/ ртр/ Симе Недевски

Редактор: Елизабета Милошевска Фиданоска