Џорџа Мелони е нова премиерка на Италија

Џорџа Мелони положи заклетва за премиерка на Италија и ќе ја предводи првата крајно десничарска влада во земјата од крајот на Втората светска војна.

Мелони (45), исто така, и прва жена на чело на италијанската влада, и нејзите министри положија заклетва во претседателската палата пред италијанскиот претседател, Серџо Матарела.

Ултрадесничарската партија на Мелони, Браќа на Италија, освои најмногу гласови на минатомесечните парламентарни избори.

Џорџа Мелони синоќа го објави составот на својот кабинет. Нејзините коалициски партнери се десничарската Лига на Матео Салвини и конзервативната партија Напред која ја предводи поранешниот премиер Силвио Берлускони.

Мелони положи прва заклетва, а потоа нејзините двајца вицепремиери од двете партии од коалицијата, Матео Салвини и Антонио Тајани, висок претставник на партијата на Берлускони Напред Италија.

Списокот на министри кои Мелони ги избра ја одразува нејзината желба да ги намали грижите на европските партнери за идните односи ЕУ-Италија поради доаѓањето на чело на владата на шефица на една крајно десничарска партија.

Именувањето за министер за надворешни работи на поранешниот претседател на Европскиот парламент, Тајани, синоќа веднаш го поздрави претседателот на Европската народна партија, Германецот Манфред Вебер, како „гаранција за проевропска и атланска Италија“.

Втора подадена рака кон Брисел е и именувањето на Џанкарло Џорџети, претставник на умереното крило на Лига, кој беше министер и во владата на Марио Драги, и кој ќе го наследи важниот ресор економија.

Популистот Салвини мораше да се задоволи со ресорот инфраструктура и сообраќај, а го сакаше престижното министерство за внатрешни работи, кое е дадено не еден технократ.

Од 24 министри само шест се жени, на кои им се дадени помалку важни ресори.

Предавањето на власт меѓу Мелони и Драги ќе се одржи утре во седиштето на владата, и потоа ќе следи првата седница на новиот кабинет.

На изборите одржани на 25 септември, на кои беше забележено рекордно ниска излезеност, партијата Браќа на Италија освоија 26 отсто од гласовите, партијата на Салвини доби малку под 9 насто, а на Берлускони нешто над 8 отсто.

Партијата на Мелони оствари огромент успех, со оглед на претходните избори во 2018 година кога доби околу 4 насто од гласовите.