Тага и истрага: 61 загинат во авионска несреќа во Бразил

По падот на патнички авион во Бразил, при што загинаа сите 61 лице во него, започната е истрага за причините за несреќата. „Прерано е за давање конкретни информации“, истакна раководителот на Центарот за истрага и превентива на  несреќи во воздушниот сообраќај,  Марсело Морено на прес-конференција.

Истрага се врши и во насока на метеоролошки и технички фактори, како и на евентуална човечка грешка, за да се открие  како дошло до пад на авионот  во станбена област во градот Винедо во државата Сао Паоло.

Снимачот на податоци за летот, таканаречената црна кутија, е пронајдена и се врши нејзино вештачење од страна на бразилските воздухопловни сили (ФАБ), изјави Морено.

Авионот на авиокомпанијата ВоеПас со 57 патници и четворица членови на екипажот во петокот бил на лет од од градот Каскавел во државата Парана кон аеродромот Гуарулхос во близина на Сао Паоло. 

Како се случи несреќата може да се види на фотографии и видеа на социјалните мрежи. Авионот се врти во воздух и паѓа одеднаш речиси вертикално од небото, а потоа се издига голем облак чад. Податоци од платформата Flightradar 24 укажуваат дека авионот за помалку од една минута загубил речиси 4.000 метри височина. 

Очевидци пријавиле несреќа и темни облаци од чад над местото на несреќата. „Отидов на балконот и го видов авионот како се врти“, изјавила локалната жителка Натали Чикари за Си-Ен-Ен Бразил „Само имав време да крикнам и да се молам како во филмовите, а потоа го слушнав огромниот крах по несреќата“.

Авионот се урнал во населена област, но за среќа никој на земјата не е повреден.

Претседателот на Бразил Луис Инасио Лула да Силва нареди тридневна национална жалост. Гувернерот на Сао Паоло, Тарсио де Фреитас, ја вети сета потребна поддршка.

Според платформата Flightradar 24, метеоролошките извештаи за периодот околу моментот на несреќата сугерираат турбуленции и грмежи во областа. Управниот директор на Вое Пас, Едуардо Буш не ја исклучи можноста дека на крилата можеби се акумулирал мраз. Сепак, пилотите биле искусни, а авионот полетал со функционални системи.

„Авионот за време на полетувањето беше 100 процентно подготвен за лет“, рече Буш.

Според медиумите, несреќата е една од најсмртоносните во  бразилската историја на воздухопловството.