Северна Кореја повторно истрела балистички ракети
28 октомври 2022
Северна Кореа испали две балистички ракети од краток дострел од својот источен брег, соопштија денеска претставници на војската на Јужна Кореја.
Ракетите се испукани од областа Тонгчеон во провинцијата Гангвон, на источниот брег на Северна Кореа, 4 дена откако Пјонгјанг и Сеул разменија оган на предупредување од западниот брег среде растечките тензии.
„Нашата армија е во целосна подготвеност“, се наведува во соопштението на војската на Јужна Кореја, со констатација дека е интензивирана соработката со САД во областа на безбедноста.
Пјонгјанг претходно соопшти оти неодамна лансираните ракети претставуваат протест против заедничките воени маневри на САД и на Јужна Кореја, кои ги обвинија дека вежбаат инвазија на Северна Кореја.
Сеул и Вашингтон ги демантираа тврдењата на Северна Кореја додавајќи оти вежбите се дефанзивни и дека се потребни за спротиставување на заканите од Северот.
Јужнокорејските трупи минатата недела започнаа воени вежби заедно со војската на САД со цел да ја зголемат способноста на одговор од нуклеарни и ракетни закани од Северна Кореја.
Од почетокот на годината Северна Кореја испали над дваестина балистички проектили, вклучувајќи го и оној кој прелета над Јапонија.