Мулен Руж ги загуби „крилата“

Ветерничкото тркало на парискиот естраден театар Мулен Руж паднало од покривот на тротоарот во четвртокот во раните утрински часови, кога кабарето било затворено. Нема повредени, а не постои ни натамошна опасност, соопшти противпожарната служба.

Причината не се знае. Претставник на театарот соопшти дека неделно се врши техничка проверка на механизмот на ветерницата, тркалото со перките на покривот на зградата. При последната инспекција не е констатирана никаква неправилност.

Експертите ја испитуваат безбедноста на зградата, чија околина полицијата ја има блокирано. На фотографиите се гледа оштетеното тркало на ветерницата како лежи на тротоарот. Искорнати се и три светлечки букви од рекламната табла на кабарето.

Досега најголемата несреќа во преку стогодишната историја на Мулен Руж е пожарот предизвикан при градежни работи во 1915 година. Тогаш кабарето морало да остане затворено цели девет години колку што траело реновирањето.

Кабарето во Монмартр е магнет за туристите и се смета за место на „раѓање“ на Канкан танцот. Тоа е отворено во 1889 година, истата година кога во француската престолнина била довршена и  Ајфеловата кула. Во октомври Мулен Руж ќе прослави 135 години, тоа е најстарото кабаре во Париз и една од неговите знаменитости. Зградата уште свети во црвена боја на гревот, иако времињата во кои го симболизирала лекомислениот Париз одамна се минато, а поплуголите танчерки не мамат толпи мажи. Публиката во храмот за задоволство во Монмартр се има сменето. Боемите од минатото се туристи од целиот свет. Секоја вечер во кабарето се изведуваат по две претстави, годишно го посетуваат 600.000 гледачи.