Бангладеш во исчекување на преодна влада

Претседателот на Бангладеш во вторникот (6 август, 2024)  го распушти парламентот, отворајќи го патот за формирање на привремена влада еден ден откако премиерката Шеик Хасина поднесе оставка и избега од земјата.

Кабинетот на претседателот Мохамед Шахабудин објави дека ривалот на Хасина, лидерот на Бангладешката националистичка партија (БНП) Бегум Халеда Зија , поранешен премиер, е ослободен од домашен притвор.

Студентите кои протестираат се заканија со нови протести доколку не се распушти парламентот. Одлуката е донесена по средбата со лидерите на одбранбените сили, политичките партии, студентските лидери и претставници на граѓанското општество, се наведува во соопштението.

Заминувањето на Хасина во понеделникот го означи крајот на нејзините 15 години на власт. Во последните 30 години, таа владееше со Бангладеш вкупно дваесет години, наследувајќи го политичкото движење на нејзиниот татко, основачот на Бангладеш Муџубур Рахман , кој беше убиен во 1975 година.

Началникот на армијата на Бангладеш Вакер-Уз-Заман ќе се сретне со студентските лидери за да разговараат за формирање привремена влада која ќе одржи избори наскоро откако тој ќе ја преземе власта.

Заман во понеделникот ја објави оставката на Хасина. Таа ја напушти земјата и сега е во безбедна куќа во близина на Њу Делхи.

Во меѓувреме, протестното движење јасно стави до знаење дека бара преодна влада предводена од добитникот на Нобеловата награда за мир Мухамед Јунус. Секоја друга сугестија нема да биде прифатена, вели Нахид Ислам, еден од главните организатори на студентското движење, во видеото објавено на Фејсбук. Ислам објасни дека веќе имало разговори со Јунус, кој се согласил да преземе одговорност. Се уште нема потврда од самиот Јунус.