15 повредени во експлозија во ресторан кај Торонто
25 мај 2018Според спасувачките екипи, најмалку 15 лица се повредени при експлозијата на бомба во близина на канадската метропола Торонто. Три од нив се во критична состојба и биле префрлени во болница. Останатите 12 лица претрпеле полесни повреди, соопштија болнички извори. Инцидентот се случи во индиски ресторан во предградието Мисисуга, во провинцијата Онтарио, соопштија властите. Канадската полиција соопшти дека експлозијата била предизвикана од „импровизирана експлозивна направа“
Полицијата трага по двајца млади луѓе кои избегале од местото на настанот кратко време по детонацијата. Мотивот за нивното бегство сѐ уште е нејасен. Спасувачките екипи беа повикани во ресторанот, кој се наоѓа во трговски центар околу 22:30 часот по локално време. Полицијата истакна дека веќе нема опасност за јавноста. Сѐ уште не е јасно каде точно во ресторанот експлодирала бомбата и колку луѓе биле таму во моментот на детонацијата.