Фудбалскиот сон на Косово | Панорама | DW | 09.09.2019
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
Реклама

Панорама

Фудбалскиот сон на Косово

Успесите на косовската фудбалска репрезентација го привлекоа вниманието на германскиот печат. Се поставува прашањето - што ќе се случува доколку Косово се квалификува за Европско првенство? Политика наместо спорт?

Fußball EM-Qualifikation Kosovo - Tschechien (picture-alliance/dpa/AP/V. Kryeziu)

Ведат Муриќи го прославува голот против Чешка во Приштина

Германските весници им посветуваат внимание на спектакуларните успеси на фудбалерите на Косово кои ја победија и Чешка во квалификациите за Европското првенство. „Малата земја сонува“, пишува агенцијата ДПА чиј текст го пренесува и Франкфуртер алгемајне цајтунг.

„Но, приказната на косовскиот национален тим е многу повеќе од приказна за обични спортски аутсајдери кои, како Летонија во 2004 и Албанија во 2016 изненадувачки се пласираа на завршниот турнир на Европското првенство. Бидејќи Република Косово дури во 2008 година прогласи независност и до денес не е призната како суверена држава од сите членки на ОН“, се наведува во текстот.

На Косово, „спротивно од она што го посакуваат меѓународните спортски сојузи, ни на некои фудбалски натпревари не може лесно да се повлече граница меѓу спортот, политиката и историјата“.

Се потсетува и на одлуката на поранешниот селектор на Црна Гора Љубиша Тумбаковиќ да го бојкотира мечот против Косово, по што експресно стана селектор на Србија. Српските навивачи на мечот против Португалија им се заблагодарија на словачките навивачи кои на еден претходен натпревар го означија Косово како „света српска земја“.

Kosovo Fußball UEFA Budapest Kongress Hungexpo Messe (Getty Images/A.Kisbenedek)

Солзи по одлуката на УЕФА да го прими Косово во членство на 3 мај 2016 година


„Тоа поле на тензии ја електризира и идентификацијата на косовските играчи со нивниот национален тим“, пишува во текстот во кој се пренесуваат и зборовите на косовскиот репрезентативец Ведат Муриќи: „Јас и моите соиграчи сме подготвени да изгинеме на теренот“.

Рајнише пост пренесува дека „неочекуваниот успех на Косово би можел да му произведе политички проблем на европскиот фудбал“. Имено, првенството следната година се игра во 12 земји. „Четири од нив не го признаваат Косово како независна држава: Русија, Романија, Азербејџан и Шпанија. И тука европскиот фудбал ќе има проблем доколку Косово успее да се квалификува“.

Косово во вторник ѝ гостува на Англија. Но, дури и доколку не успее низ квалификациите да дојде до Европското првенство, останува патот преку Лигата на нации. Тука Косово игра во решавачката фаза против Северна Македонија, Белорусија и Грузија.

Германскиот портал sport1.de заклучува: „Една мала земја натоварена со проблеми сонува за Европското првенство. Бидејќи, кога се работи за фудбал - Косовците се целосно луди“.

DW.COM

Реклама