Тензични протести во Скопје: Демонстрантите се обидоа да влезат во владата | Северна Македонија | DW | 04.07.2022

Посети ја новата страница на DW

Погледнете ја бета-верзијата на dw.com. Сѐ уште не сме готови! Вашето мислење може да ни помогне да ја направиме подобра!

  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
Реклама

Северна Македонија

Тензични протести во Скопје: Демонстрантите се обидоа да влезат во владата

Повеќе демонстранти ја пробија заштитната ограда и се обидоа да влезат во зградата на владата во Скопје. Откако полицијата ги спречи, дел се упатија пред зградата на Собранието.

Протестите против францускиот предлог за почеток на пристапните преговори на Северна Македонија со ЕУ на третиот ден станаа насилни откако група демонстранти ја пробија заштитната ограда пред Владата во Скопје и се обидоа да влезат во зградата. 

На протестот пред владата повторно дојдоа повеќе илјади незадоволни граѓани под мотото „Ултиматум– Не благодарам“. Набрзо по интонирањето на националната химна која ја отпеа Ламбе Алабакоски, кон владината зграда од првите редови на протестот полетаа првите јајца, шишиња и петарди. Група од десетина, претежно млади, демонстранти најпрво ја урнаа заштитната ограда, а потоа тргнаа кон влезот во владата. На скалникот беа сопрени од полициски кордон и обидите да продолжат натаму не беа успешни. 

Поголемиот дел од собраните граѓани пред владата останаа настрана и со бодрење ги поддржуваа обидите на малата група да го пробие полицискиот кордон.

Демонстрантите скандираа „Оставка“, „Никогаш северна, само Македонија“, „АСНОМ живее“, „Бугарски фашисти“ и пееја патриотски песни.

Поголема група демонстранти продолжи кон Собранието каде исто така беше урната заштитната ограда, но мал полициски кордон ги спречи демонстрантите да се доближат до влезот во зградата. Скандирањето таму во поголем дел беше насочено кон претседателот на државата Стево Пендаровски. Протестот пред Собранието заврши околу 21 часот. 

Повод за протестите е францускиот предлог за отворање на пристапните преговори на Северна Македонија со ЕУ. Опозициската ВМРО-ДПМНЕ и други партии и здруженија, кои повикаа на протести, сметаат дека предлогот е неприфатлив и треба да се отфрли. Владата викендов започна процес на консултации за предлогот.

DW.COM