Симовски: Утре почнува пописот, податоците во јануари

Директорот на Државниот завод за статистика Апостол Симовски, во интервју за МИА, вели дека по успешно спроведениот попис овој септември, државата во наредниот циклус на пописи околу 2030 година, ќе може да спроведе попис целосно базиран на регистри.

Бидејќи пописот ќе се одвива во услови на пандемија на коронавирус, тој ќе се спроведува под строг и прецизен протокол.

„Нашите попишувачи се запознаени со Протоколот, веќе им се распределени заштитни маски КН95 и средства за дезинфекција и точно знаат како треба да се однесуваат и што треба да направат при влегување во едно домаќинство. А тоа е: – правилно да ја носат маската, да побараат од домаќинот, доколку не носи маска, да стави маска, да ги дезинфицираат рацете пред да влезат во домот како и лаптопот со кој ќе го вршат попишувањето и доколку попишувањето се врши во затворен простор, да замолат да се отворат прозорците и распоредот на седење да биде со задолжителна дистанца од најмалку 2 метра. Секаде каде што дозволуваат условите се препорачува попишувањето да се спроведува на отворен простор и мислам дека временските прилики ќе ни го дозволат тоа", истакнува Симовски.

Според него, за секој од 50 пописни региони е предвиден оптимален број попишувачи, во повеќето региони ги има во доволен број, а само во неколку ќе се ангажираат лица според олуката на Владата за ставање на располагање на дел од вработените од централно и локално ниво. Пописот трае 25 дена што е доволен период за целосен опфат на населението на целата територија на државата.

Симовски го објаснува и комбинираниот модел, со оглед што ова е прв попис кој се спроведува на тој начин.

„Комбинираниот модел подразбира одење на терен, односно попишување лице в лице и користење на податоци од бази. Вообичаено, овој комбиниран метод е преодна фаза меѓу класичниот попис и пописот базиран на регистри. Што подразбира тоа: прибирање на податоци директно од населението на терен и користење на податоци од таканаречената Претпописна база на податоци која е компилирана од повеќе бази кои постојат во државата и чијшто квалитет е анализиран и проверен. Со внесувањето на матичниот број на граѓанинот во пописната апликација, автоматски се повлекуваат сите податоци што за тоа лице постојат во базите во државата. Секако остануваат прашања на кои лицето ќе мора да даде одговор бидејќи за тоа не постојат записи во базите, а ова особено се однесува на чувствителните прашања за етничка припадност, вероисповед, мајчин јазик и јазик кој вообичаено се зборува во домаќинството. Ова се прашања со кои се искажува лично чувство и затоа се внесуваат одговори онака како што ќе се изјасни лицето."

Пописот ќе трае од 5 до 30 септември, а податоците треба да бидат објавени 6 месеци по  завршувањето на теренските активности, но Симовски верува дека тие ќе можат да бидат обработени и познати до јануари 2022 година.

„Со Пописот ќе се добијат огромен број на податоци кои ќе бидат од интерес и важност за речиси секоја сфера од живеењето и работењето во државата. Прво и основно , ќе добиеме точна бројка колку не има во државата и каде сме  точно распоредени, односно прецизна територијална распределеност на населението дури на километар квадратен. Ќе се добие прецизна слика за половата, старосната, образовната, економската структура на населението. Потоа ќе се добие прецизна слика на станбениот фонд во државата и неговата состојба, карактеристиките на станбените единици и нивната разместеност, ќе се добие слика на условите за живеење на населението – тоа е навистина едно огромно богатство на податоци, показатели кои ќе не насочуваат каде и како треба да се движиме во иднина“, потенцира Симовски.

Во однос на граѓаните кои се во странство, а кои можат да се самопопишат на веб страницата на ДЗС, можност што ќе трае до 30 септември, Симовски вели дека досега тоа го сториле  приближно 191 000 македонски државјани во странство.

„Очекувавме поголем одзив кој некако спласна по одложувањето на пописот во април и сега очекуваме дека повторно ќе се интензивира овој процес,“ вели Симовски.